VACHHUH 2017 AUGUST ISSUE

Editorial

Palyupalih tlahpa nôpawzy

Thlazoh Thlapa he eima Awnanopa ta Maraland Education day eima hmâna thlapa a châ. Eima Awnanopa heta thaina sohna liata a vaw kiathy via thei nawpa he vaw pachâ kaw ta Chavâta Pastor nawh nata Sawhkha rai ahria penaw zydua ahmôpakhyna vaw tao ta he hawh heta Maraland Education day ahmâna hnei awpa apeimawhzie he a vaw hmô papua. Eima Awnanopa ta thlapa nata sapa pachhana (Holistic salvation) he angiapa. Chavâta thaina sohna chhao he hnei cheingei awpa ta arapasua nga haipa a châ hra.

Education Department tawhta Theological  Education nata Secular Education Khazohpa bie nata Khizaw thaina ama hnei pha lyma nawpa ta maophaona a vaw hnei. Khazohpa bie hrawpiepa liata Na Nô nata Na paw palyupalih teh (Pua. 20:12) liata miah a chho. He eima  nôpawzy  he ahyzyma ama cha tahpa he saw nawhzy liata pahmôsa lymâ awpa a châ. Vianawh Budazyna tacha nô nata paw nata saya nawh he Khazohpa  tluta achhy eita ama palyupalih. Keimo deikua la achhy lei awpa ta eima palyupalih tlai awpa a châ. Palyupalih tlâh awpazy eima palyupalih lei vata Khazohpa byhnâ â khaw ngapazy eima châ pathlei lei awpa pahmo abyuh kaw.

Chavâta Mara Evangelical Awnanopa ta Saya/Sayama nawh he palyupalih tlâhpa ama cha zie sawnawh pachu lyma awpa apha. MEC Awnanopa cha lyua thlyupa cha pita eima sawnawhzy he kô (4) taih dei he o chhôh liata y ta kô (5) tawhta dyh achâna taih he se O liata saya, sayama nawhta miah ama mohôhpa ei ama châ. Eima sawnawh apasopakâtuhpa he amo ama cha. Keimo asapa anô nata apaw hlâta saya, sayama nawh he achyhchaita kô (15) chhôh dikari ama hmô nataih ama mohôhpa a  châ.

He va he ta kôkha liata ei (1) he cha, saku hawtizy ta ama nôpaw saya nawhzy he palyu-palihna noh tahpa Maraland Education day he hmâ lymapa a châ. 2017 kô he cha thlazoh noh (8) noh he hmâ khai awpa chata Hria hei noh ta pachhyhpa a châ. Achhapa cha lyu a thlyupa sawtazy eima cha vâta hriatua noh he nôpawzy ta sawnawhzy ku ruapa ta saku (se o) lâ ama khy lei nawpa ta lyu liata a puapa thothei ahnalasiezy phao awpa noh a châ. Eima saw nawhzy nô nata paw tlai acha viapa saya nawh he hmo chyhpa ta chhata palyupalih thaina pachu lyma awpa a châ.

Hmot. 20:35 liata “Hmôna hlata piena la he byhnâ a y via na tahpa ta eima hmô. Nô nata paw a châpazy pita piena hro eima hnei thai lei vâta hmôna lâ chhao achy kaw khiahma tah awpa a châ. Eima saw nawhzy châ ama thai thei via nawpa ta Khazohpa bie hawhta Kuriapha kawpa ta Saya, Sayama nawh he palyupalih thaina ma hnei lyma nawpa ta pachupa lyma ei su vy!l

§§§§§§§§§§§§§§§§§§§§§

Rev. Dr. Zôdau Germany Khitly Report

Awnanopa khokheina vâta Reformation awnanopa zydua ta Martin Luther Awnanopa reform a vaw tao tawhta kô 500-na alyna châta Program miakha a cha hrapa Seminar Exposure ahlao thei hra nata cha liata hmôpa nata achutlâhpa hmozy arylâ hawhta report-na ei vaw hnei.

1. Seminar liata cha kô 500 akhô hawpa liata Martin Luther ta ngiapâtuhpa pakha ta a pahno cheingei awpa Khazohpa biezy tahpa “Small Catechism” châbu chyhpa chôta atanoh duahmo ahmiena mopazihna seminar a cha.
2. Cha seminar lata Asia nata Australia zy liata Awnanopaluhpa Theologian, Scholar nata Bishop zy mo 25 hruapa a cha. Ama râh chyu ngiapâna duahmo ngiapâna paper rei chyupa a cha.
3. Cha liata kei chhao “Lutheran Identity of Mara Evangelical Church tahpa paper ei reih hra. Keima rei liata MEC nata Lutheran ngiapâna he alyunazie hluhpi a ypa ta pahnopa a cha. Khazohpa bie pasâhsana, Misssion pahâhna, awnanopa apôhkhana pasâhsana, nata moh abiena kyh liata eima lyu via pachaipa ta pahnopa a cha. Chavâta MEC awnanopa ta Luther ta a vaw duakhei laihpa ngiapâna nata taoziezy liata a vaw ngâchhih kawpa hawhta maniah ama pahno hra. Cha kyh vâta, keima pakha hmôna liata, MEC awnanopa cha Luther world Federation liata member achâpa he khichhai kawpa leipa pita, paw o tlôpa tlu ta ei pa châ. Eima missionary rônâhpa Rev. R.A Lorrain chhao he Protestant awnanopa ngâchhihpa a vaw châ tlai hi.
4. Khozohpa Bie pasâhsa via rili awpa nata Khazohpa bie pahno-pathu via awpa maniah a pahao ngâsâ. Keimo cha Khazohpa biehrai eima pahno dâh he a ie-âna rakha khia mawh tahpa maniah a pahneisa. Germany mo cha pakhona ta, Luther ngiapâna châbu chyhpa (small catechism) liata Zisu Krista thlachha pachupa he ama reina chhâpa ama pahno. “Na khihnarâh vaw tlô mawh sy!” tahpa eima rei ngâ nota khapa ma eima reikhoh tahpa a yzie siana chhaota ama reih aw. Keimo deikua achhâpa pahno leipata Zisu Krista thlachha pachupa a reih ngâpa hluhpi eima y thei aw.
5. Seminar khôtho lâta achupazy cha, Germany râh cha râh phapa nata râh khochhihpa achâzie a râhmia mopata pahnopa a cha. Lâthlô pha kaw ta, a chyhsazy, sawkha dâhryhpa ama za ngâsâ. Ama râh pasô ngâsâ eita, pawpi sadô hawh tlai ta ama mohôh. Germany râh liata cha khizaw liata motor car pha chaipa campany zy yna râh cha ta, chyhsa mo 100 liata motor avaopa 40 ama y aw. Cha ta motor car ahluh ngâsa tahtheipa a cha. Chahrasala, avâzy moh pita hro sili ta asia ngai takaw. Mokhu meihdozy y tlâ vei. Avâ sua hrasala, ama chavahzy ti pano tlâ vei. A yzie cha khih nata râh mohôhna liata ama pahnie kaw tah awpa a cha.
6. Alei chhôh tawhta tlyma, alei chô tawhta tlyma hmo a puapa hnei taraw leipa eita, chahrasa, ama sôhna lathli abôchhapa ta ama hmasiena ama tao. Pkn ta alei su ama hneipa acre miakha hnei ei sala, cha liata solar phiapa pabiepata zawh eita, cha tawhta a vaw puapa power cha companyzy lâta zuapa ta chhôhkha ama patipavy.
7. Khazohpa byhnâ ama topa pasô kaw eita, electric current cha ama peimawhna daihti liata deita akhaih awpa hmâh eita, t cha mawh sala, ti ama padaohna daihti chhôh deita a vaw loh thai awpata ama tao. Chavâta Khazohpa byhnâ ama pasô thaina cha ama byhnâ to baichhana ta ama ngiapâ.

He hawhta râhpha viapa nata achu awpa hluhpi na patosatuhpa Assembly nata Awnanopa nôpawzy chô liata alyna bie ei cha hlâ ei. Khazohpa byhnâ vaw to chyu the u!

                          §§§§§§§§§§§§§§§§§§§§§

KNP Section

1. July 17, 2017 Zala daw (2) liata mala KNP, President, Pihnô Simaih nô cha taotuhpa Paw Khazohpa hnohta maniah a siesai haw. Asiesaipa chhôhkha nata Awnanopazy chata thlahchha bao chyu su vy.

2. Lialaipi (A) nata L,Station, Lialaipi Vaihpi Local miah (3) KNPzy ta KHD O sana chata Okhe nohkha chhôh  maniah palypa thei eita  ama chô liata MEC KNP zydua vyuhpa ta ama piepasai na zydua vâta alyna bie ei hla hmeisei ei.

3. KNP Quarter (Lialaipi) sapa thiehpa cha pango (patlo) hawpa a châ.

Pihnô Vupar
KNP, Secretary

                    §§§§§§§§§§§§§§§§§§§§§

KTP Section

1. Germany tlyna report

June thla chhôhta Rev. Beilawkhai Germany khitlyna cha Awnanopazy thlahchha baona vâta Date 17 Jyly, 2017 noh daihti liata Sabyhpi office ei vaw tlô haw. He liata a vaw tlô theipa school hawti cha, râh (26) tawhta mo (41) ama châ. Cha tawhta WCRC General Council chhao a hlaopa hra. General Council liata a vaw tlô theipa memberzy cha khizaw kaoki lia tawhta mo (1200) rachhôh ama châ. Germany liata eima chuchaipa cha:

(a) Râh nata thokô. Chavahsa nata râhsazy pabohsa awpa he Khazohpa ta miah â hnawpa a châ.
(b) Thyutlia-zy he myla hânoh ta râh nata Awnanopa achhitha awpa ama châpa vâta thata chhitha pha awpa,
(c) Achhyna o lâta thyutliazy ama tlô thei via nawpa ta Achhyna dâhzy panano awpa kyh zy a châ.
Chavâta keimo thyutliazy ao reih he nôpawzy ta namiah thei thai via ei sala, raiphapa eima hriapazy he khokheina maniah hnei via ei sala, khizaw kiathyna chatliena liata ama y pachhao he maniah nama pahno thai via nawpa nata, thyutliazy lâpi phapa liata ama sie thei via nawpa ta mania nama chhihtha via lymâ awpa he a peimawh kawpa a châ haw.

2. KTP Quarters – Sabyhpi liatapa cha Sapathipa châta patlo hawpa a châ. Dated 24.7.2017 (Mon) liata KTP Secretary patôh-patiahpa ta GS, KNP Secretary, KHP Secretary, Sabyhpi biatuhpa, Sabyhpi Vaihpi Local nôpaw, Imanuel Local nôpawzy nata Sabyhpi- Imanuel Join KTP nôpawzy chhaota alyna thlachhâna tao hawpa achâ. He O châta thlah a vaw chhâtuhpa KTP sahlao zydua nata Awnanopa zydua chôlâ liata alyna bie eima cha hlâ.
3. Alyna bie hlâna: Nama Local liata KTP Hâta nama hmâpha kawpa thâtihzy eima vaw dao theipa nata KTP Hâta sôh nata Targetzy nama vaw pangia pha lymâpa vâta eima chaly kaw. KTP Department ta rai a hria thei lymâ nawpa ta nâmo Local KTP tawhta sôh pangiana liata nama vaw tiama lymâ awpa chhao Krista mohta eima chanao.

§§§§§§§§§§§§§§§§§§§§§

KHP Section

Eima Beipa Zisu krista ta “Hawtizy namâ ly khiah keima nâ lypa nama châ” tahpa ta Mathai 18:5 liata a roh. Hlazy 127:3 liata Hawtizy/Sawnawhzy he Khazohpa tawhta eima ryuto sôh chaipa a châna eima hmô hra.
Keimo manô-mapaw, Nô-paw uhta a châpazy ta khatlu ta e Na samoh-Saw-nawhta, sanawh hawtipazy he eimâ ly? Hawtizy eima ly vei khiah Khazohpa a ly leipa eima châ aw. Eima Hawtizy eimâ lyna khei hawhta e eima palâsa? Apha kawpa ta thlah eima chhâpa ma?

Kôchareih ama pi noh ama tlo tita khei ta eima lyna eima palâsa? Ama byhnâ to thei nawpa ta kha hawhpa hmo e taopa ta eimâ lyna eima palâsa? Ei ly tahpa tawhta khei hawhta e eima Hawtizy eima chhihtha? Eima hawtizy eima khâsia lohlia lei khiah eima Hawtizy a ly leipa eima châ aw. Eima Hawtizy hrozi phana, Hnatlâna, Achuna, Apakhy-Sunday Siku a chuna hpz kyh liata deichhy phana he Hawtizy eimâ lyna nata Khazohpa eimâ lyna a châ hrana kyhzy khâ a thei thlâh lymâpa ta MEC KHP he thlachhâ bao via lymâ ei si.

By- KHP Secretary

                                               §§§§§§§§§§§§§§§§§

Pahnosana

1. Hnatlana avai awpa thâtih peimawpa

Chin Naws 24.7.2017 noh ta Zawpi pahnosapa cha. Kahraolaipa H1N1 hri-ia he Matupi  khipi liata tlôta, Chyhsa mo (10) he zaikô thohna O mona su lâta paphao eita H1N1 hria-ia a châ tahpa a châ. Viarah chhôh zydua ta pa (12) ama thi haw tahpa a châ. He pasana cha aryla hawhta a cha aw.

1. Apakhu aw, 2). Apôhpa apalo aw, 3) Ahnati arâh aw. 4) Aluh achaih aw. 5) Aluh amaoh aw, 6) Athei alo leipa ta a y thei (7) Apohpa aku aphei a chaih achao aw. 8) Aku aphei acha kua aw, he hawhta pasana a ykhia thohna o lata apamosa palah awpa a châ aw.

A vaina

1. Hmao apamaina hmâ awpa
2. Pakhutita hmaothy apamai ha awpa
3. Ku apathaih kawpa ta asi ha awpa
4. Chyhsa hluna lazy abyuh leipa ta vaw lei awpa
5. He hawta tlahleina a ykhia thohna o la thlai ngia ha awpa a châ aw.

He hri-ia he husona thlih tawhta apakia theipa a châ.

2. Thohna phakawpa

Hmokhaw, Lopo nata pazopazona lapizy lâta alô a ypazy châta, thohna phachaipa cha arih, ramaw, chhôh liata ti a ôpa, (arihti) kha dopa ta alô azao haw tahpa a châ. Chavâta arih chipho (ramaw, rahne, rachei, ravaw) hawpazy he ahrohpa chhôh liata apathai kawpa ta ti a ô pakha doh la  tlah na a châ. (BBC news)