Bible for Mission Thatih
Rev. Vazilai
Registrar of LTC & Contact Person of MEC

Biehmiapa

Bible for Mission he Biehrai Piena ta chakaona liata a pahâpazy ta padua leipata y molo theileina vata February 17,  2017 noh ta  ama vaw paduapa châta paduana chhapa nata a chakaona rai thatih a ry liata a kipata palâsapa acha.

Bible for Mission Padua Peimawh zie

Lorrain Theological College & Mission Studies Centre ta 2013-2014 achuna kô liata Asho Mission Field lâta Christmas Carol Gospel team sie awpa ta mia tuah ta, pa (12) ta Asho Mission field, Ann Township Dalet Chavah hnaw lâta eima sie. Cha daitih liata eima tyhpa hlupi hry ta ngiapâtuhpa thiehpa zy Biehrai pie awpa a ngiazie mia a pahnosa hmeiseih. Chahrasala pie thei mapi. Pei eima tah ngasâ. Gospel Team eima siena daitih liata Krista Zisu he ABeipa nata Pachhatuhpa a châ tahpa a vaw pypa, Bati pachasapa maluh (19)  cha eihta Bati pie khai tawhta Biehrai chhao eima pie thei leipa khâ eima paloh mania hria kaw. Taotheipa hnei mapi. Thlah dei tlao eima chha tyh.

Bati achâpa zy ta Saya kheita thlah eima chha aw, kheita eima y ba aw?  tah eih ta, My pati nie thlahchhana nata amo chyh ta thlahchha awpa nata thlahchhana y zie dei he a pachhôhpa ta pachupa chata, Pahanoh he a pakhy awpa thlahchha awpa tahpa zy eima chhôh(pachu)pa hra. Anodeikuala, Biehrai pie leipa ta eima siesai syulyu hei bao cha! Aw! kheita ama pitlôh awva tahpa ei paloh na hria kaw. Bati achâpa maluh rohpa dei he ma? eima chakaona a cha hla aw tahpa he ei pachâ lymâ tyhpa a cha. Pitlôhpa Awnanopa ta tao awpa he zaw! Kheita hmala sila a pha awva! tahpa pachâna he dia bei vei. My thlahchha dah, Za thlahchha dah, Pahanoh my Biehrai reih ta a pakhy awpa, hlasa awpa, thlahchha awpa chhao pahno leipa, taothai leipa ta y lymâ thlah-ha eihta, ama taotyhpa nata ama y tyhpa hawh pyly ta ama vaw cha thlaha hei aw. Biehrai rei awpa ama hneileipa vata ngiapââna lia hmasiena hneileipa ta ama châ he zaw ei vaw tah!

2015-16 Lorrain Theological College and Mission Studies Centre achuna kô liata Asho Mission field liata Field Secretary (Supervisor) Rev. Thauko tawhta Biehrai ama khôhna nata peimawh zie na vaw chho ta ngiapâtuhpa Awnanopazy lâta Facebook liata tlâh zawna ei vaw hnei. Biehrai piena ta chakaona a hnei khôhpa vaw hlu kaw eihta, USA tawhta Ami nata chhohkha & Tidim chyhsa chhao, Pino Neisi (Australia), Pino Neisi (Chachano: USA) zy ta ama vaw chakhei. Acha khei awpa ta a khohpa, Ngiapâtuhpa ama hlu kawpa ta pahnopa a cha. Cha hawhta avaw cha khei eita a rohnah hmesieh. Anodeikuala record nata report liata eima phahla kawpa ta pahnopa a cha.

2016-17 achuna kô liata Saya Kyaw Hla ta Biehrai ama peimawhna vaw rei heih ta Facebook liata tlâh zaw heihpa chata ngiapâtuhpa Awnanopa sahlao papangaw ta a vaw chakhei awpa ama khôhna ama rei chyupa a cha. Kyaw Hla ta bu 20 tahta, pakha a vaw chakhei ta a dai haw tahpa ta y molo thei tlâ khao leipa eihta, Khazohpa raihria â para (â hra) khôhpa vata ama khôhna he Khazohpa ta pahno ta kheita tao awpa a châ aw tahpa a saohiapa a cha. Asao hiana nata reihpahmaopa liata ama zydua ta Biehrai piena ta Mission chakao theina lâthloh he tao aw, padua awpa ama khôh hmeiseih chyupa ta ama rei chyupa a cha. Chavata Bible for Mission he Khazohpa khinarah châta padua pathaopa a cha. Khazohpa ta eima khôhpasana nata saihiena, kyhpachâna he Anoh khinarah kawna chata byhnâ pachâ sa lymâ sala tahpa he eima thlahchhana a cha. Tahma he eima hria pathao ngalana daitih chata Bible for Mission he a thatlô via lymâ sala a byuh khiatala LTC he Mission Studies Centre a chapa vata LTC ta Assembly report a piena liata eima chakaona zydua pahlao theina lâthloh chhao eima tei awpa a cha aw.  LTC nata azaopa a chakhiatala Assembly report awpa cha awhta chakaona kyh liata deikua free kawpa lôhthai ta chakaona a cha aw. Pasaipa-ina budget thliena y aw vei. LTC nata azao ha khiatala record pha viapa lâta eima pangai viana a cha aw.

Bible for Mission Thatih

Moh: Bible for Mission
Motto: Chyhsa to Biehmeiseihpa Pahno awpa (I. Tim 2:4)
Paduana kô. 17^th, Feb. 2017

Bible for Mission (BFM) he Mara Evangelical Church (MEC) ta a chakao ngala haipa Mission field lâta Myanmar Bible bao tyh awpa ta chakaona a pahapa zy a pahmaopa ta paduapa a cha. He Bible for Mission he Assembly pahno kheipa ta paduapa chaleipa ta a pahapa zy ta MEC ta Mission chakaona a hneipa liata eima taotheina hawhta deichhyh thaina lâthloh taopa dei a cha. Biehrai a khohpazy ama y tyhpa vata bao thaina lâthloh chata paduapa a cha. MEC ta a chakaona liata deichhyh awpa dei chata a hropa a chhuahna y vei. Biehrai a khohpazy ama y tyhpa vata piena lâthloh taona dei ta a châ. Bible for Mission y zie cha detail he hmiala eima pahnosa aw. Bible for Mission Facebook Group padu tawhta a kipa ta eima pahnosa lymâ aw.

Bible for Mission Paduana liata Member zy

Member he eima hlu theina hawhta pasaipa a cha. Member zydua he eima raihria a lao khaipa chata chakaona tiama chyu awpa ta a chhuah awpa a cha

Board raihria awpa ta aryh lawhta paduapa a cha. Member zy cha:

Rev. Vazilai (Yangon)
Pupa Bh. Vabietlei (USA)
Pupa VaAye Thaitei (Denmark)
Pino Neisi (Australia)
Mch. Simeawna (Kalay)
Pupa Hratha (Malaysia)
Mch. Khaiko (Singapore)
Pupa Hemau (Australia)
Mch. Bieli (Perth, Australia)
Rev. Pahmo (Yangon)
Mch. Zakaw (Kalay)
Pupa Vabiehlo Chozah (Australia)
Pupa Thadek Khithie (Australia)
Rev. Cho-u (Maryland, USA)
Pupa Aheizah Khuhly (Autralia)  zy cha eihta, ahyrai meba châ lyma theipa a cha.

Abyu ha khiatala hmiala cha luhpazy padua theipa a cha hra aw.

Member chatheina nata yzie

1. Mission Field lâta Biehrai a piepasaikhôhpa nata a pahapa ahy rai member chatheipa a cha.
2. Member châna liata fees pangia awpa a cha aw. Fees he eikha dei pangiapa cha awhta thliena y vei. (Biehrai tlyma? Taka tlyma? thliena y leipa ta pie theihpa a cha)

Paduana chhapa

Kô tato ta Biehrai a khohpa he Mission field liata Ngiapâthiehpazy liata ama vaw y lymâ tyh. Chakaotuhpazy tawhta, Biehrai he ama khôh kaw tyhpa thatih he dao tyhpa châta Biehrai piena heta ngiapâtuhpa thiehpa zy ama pitlohna a châ zie chhao pahnopa a châ. Chahrasala chakaotuhpazy tawhta tlyma ngiapâthiehpazy tawhta tlyma, baona hia lymâ awpa he rairuna zy a y tyh. Baona hiapa chhao ta a yzie a hnei nata hneilei liata palôh lalaona a y thei aw. Chavata Ngiapatuhpa Awnanopa sahlao zy ta Free kawpa chakaona liata apahapa zy y pahmaona Bible for Mission he padua awpa ama pachâpa he Khazohpa ta hlao patlô ta paduapa a cha. He Bible for Mission heta Biehrai he a taotheina hawhta pie tyh awpa a chhuah ta, Biehrai a khohpa ngiapâthiehpazy Biehrai vata rairuna ama hnei lei nawpa ta, pietheina lâthlôh nata y zie zy tei lymâ ta pasipakao awpa a chhuahpa a châ. Chavata paduana chhapa cha:

1. Mission field liata ngiapâthiehpa zy ngiapâna pitlôhpa ama châ via lymâ theinawpa ta Biehrai piena ta deichhy awpa
2. Ngiapâthiehpa nata Chakaotuhpa zy Biehrai vata lalaona nata rairuna ama hnei lei nawpa ta pachâ khei awpa
3. Châbu chyhpa (Pamphlet) ta chakaotuhpa zy deichhyh thei awpa

Bible for Mission raihria

1. Biehrai a peimawh hmeiseihpa Ngipâthiehpa zy lata Biehrai pie awpa
2. Kôkha eikha a chyh chaipa ta Biehrai pie tyh awpa
3. Biehrai pie awpa angiahpa mai â ma vaw hia theina lâthloh tao ta, pie lymâ thei awpa
4. Biehrai pie awpa châta lôhthai ta a piepasaina tao awpa
5. Mission field liata chakaotuhpa ta Biehrai piena ta chakao thei chaipa lymâ piena hnei awpa
6. MEC ta Mission chakaona liata Biehrai piena ta deichhyhna deita chakao awpa
7. Biehrai nata Taka a ngiapa nata piena y zie palasa lymâ awta record phapa nata report phapa a tao lymâ
8. Face Book Group paduapa ta raihria deitail palasa lymâ awpa
9. Yangon base ta raihria lymâ awpa a chapa vata Yangon liata Record bu nata report zy paso awpa

Chakao theina lâthloh

1. Bible for Mission lâta Biehrai tlyma Taka tlyma thliena y leipa ta ahy rai a piepasai thei lymâpa a cha.
2. Bible a khôhpa Mission field lâta ngiapathiehpa nata chakaotuhpa zy nata achhoh hia tyh awpa
3. Bible peimawh hmeiseihna a y khiatala Bible for Mission lâta kâchhie leipa ta a zao lymâ theipa a cha.

Bible eima piepa Chakaotuhpazy Pahno awpazy

1. Biehrai he zua awpa cha vei. Pie leipa ta apaso awpa cha hra vei.
2. Biehrai pie awpa peimawhpa mai, kâchhie leipa ta BFM la he a zao awpa, hia awpa
3. Nama hiapa Biehrai nama piena kyh kha report pie ta a byuh khia hia chanei lymâ theihpa a cha.
4. Krizyhpa lâta a vypa Zisu Krista a vaw ngiapâthiehpa hlupi hnota Biehrai a hlu chai a pie theihpa chakaotuhpa he Bible for Mission ta kôkha ta eikha lymâ sôh kawpa a pie lymâ aw.
5. 2017 tawhta pathaopa châta 2018 April thlah liata kôkha chhoh ta chakaona tiama chaipa chakaotuhpa Biehrai hlupi apie theih chaipa he lymâ pie awpa a châ aw.
6. Chavata nama piena he vaw report phapa vaw pie lymâ ula Bihrai chhao he kachhie leipa ta a vaw hia lymâ bei te u.
7. Krista Awnanopa châta hria lymâ su! Rietheina y hrasala hmiala to lymâ su!

Biepachhana

Ahyrai ta thiena hawhta Bible for Mission liata nama vaw hlaohli theina lâthloh y ta, Biehrai a ngiahpa nata khôhpa zy chhao nama vaw zaotheina hra. Chavata taopa Bible for Mission a cha. Bible for Mission a vaw ynawpa ta Biehrai piena ta a vaw chakao hawpa, chakoan lâthloh tao awpa ta akhôhpasapa namo ngiâtuhpa zydua nata tahma tawhta a vaw chakao awpa zydua chô liata eima ly hmeiseih. Bible for Mission he a vaw pazao chyu te u. Eima cha hrua lymâ. Bible for Mission hro parei sala byhnâ châ lymâ thei mawh sy!

Biehrai a piepasai khôhpa nata Biehrai a khôhpa zy azao nawpa address cha:

1. Rev. Vazilai @ Van Ding Lian
   Bible for Mission
   65/B Marga Rd, Phawkan Insein
   Yangon
   09960244991
2. Rev. Pahmo
   Bible for Mission
   65/B Marga Rd, Phawkan Insein
   Yangon
   09421045978