Article he 2019-2020) liata Papuapa KTP Magazine tawhta lahpa a châ. By Admin                                        

Abeipa ta Rev. R. A. Lorrain nôvah maniah vaw tuapa ta, âmo nôvah hmâpa ta (Notlah Mara nata Nochhi Mara) cha “Krizyhpa râh” a vaw châ haw. Mara Awnanopa cha hmah vaw sie via laih lymâ ta, vaituhpa nata deichhyna rai peimawh kawpazy chakaopazih thei nawpa ta Krizyhpa Thyutlia Py he ama vaw padua. Kô 1928 liata Missionary Satlia Albert Brunce Foxall (Vailipaw), Laihsa Irone Hadley, Laihsa Tlosai nata Saikao Laihsa Chepau zy ta Satlia Laihsa Sunday School pachuna ama vaw pathao tua chai. Daihti a vaw sie laih nata khisaw vâtlâh hro taopathi heihna kyhzy, a tlâh leipa deichhyna kyhzy vaw hria via ei ta,[1] lyu nata o raihria thei khao leipazy mohôh ta baokhâ lymâ awpa ta, khih to liata GA (Girls Auxiliary) py cha kô 1946 tawhta ama vaw padua.

He GA he Chanô Py a vaw duah tua chaipa, bao a ngiahpazy a vaw bao tuatuh chaipa py a vaw châ. He py raihria vâta vaih nata tlâh, khichhôh liata byuhpa maih vaw bao ei ta, ama vaw deichhy lymâpa vâta khitlâh phao a vaw hua ta, he py he reithai tlâh ama châ ngaita kaw.[2]He hawhta chanô py ta khihtlâh phao pahuapa ta kyhpachâna rai hria phapa ama hria haino he ta, Chapaw Py thlai a vaw duah hrapa cha “Boys Scout” he châ ta, uhthei viapazy chhithana rai thlai vaw hria lymâ ei ta, khitlâh ta a vaw pha hnai khei ngaita. He liata Puhpa H. Zachô, Saikao nata Pinô Chiapy Nôhro, Saikao zy pathi-palôh liata Satlia nata Laihsa zydua pykha liata y ta, khitlâh phao pahuatuh awpa py padua awpa khona vaw hnei ei ta, eima misawnari chhôhkhazy thlai a vaw saohiah ei ta, âmo ta Mongyu râh lâ a vaw saohiah ei ta amâ kaw chhyna cha “Satlia nata Laihsa Akaona Py (Fellowship of Christian Boys and Girls) paduapa ta, apakhyna zy chhao hnei tyh eita, awnanopa châ chhao ta rai ama hria tyh” tahpa kaw chho ei ta, he vâ heta aly kaw ei ta, târi June 10, 1947 “Satlia Kaona nata Liahsa Kaona” achyuhna zie ta “SK&LK” tahpa “Py” thlai ama vaw padua. Chhithatuhpa hmiatuapazy cha: H. Zachô, Pihnô Chiapy, H. Hramâ, H. Solomon, Miss Thleipy, Miss L. Ahie, H. K. Thadia zy ama vaw châ. Puhpa H. Zachô he President hmiatua chaipa châ ta, Pihnô Chiapy Nôhro he Vice President hmiatua chaipa a châ hra. Puhpa H. Solomon he Secretary hmiatua chaipa zy ama vaw châ.

KTP Moh pathlaina

SK & LK tahpa moh cha June 10, 1947 tawhta kô 1964 taihta a vaw hmâ tawhta, “Krizyhpa Satlia Laihsa Akaona Py” (SKLAP) ta a vaw panono haw.[3] Kô 1972 liata Silver Jubilee chhao local chyu liata taopa a châ. KSLAP pakhypi chhao hnei tyhpa a châ hra.[4] He SKLAP moh chhao he kô 1983, KTP Pakhypi ta vaw panano heih ta “Krizyhpa Thyutlia Py” (KTP) tahpa vaw châ ta, atanoh taihta he moh he hmâ lymâpa a châ.[5]

KTP â vaw duana chhâpa nata hmo achhuahpazy

1. KTP ta Khazohpa chakaona rypaohpa ama hnei thei n‟awpa
2. Khazohpa khinarâh pakawhsa awpa
3. Thyutliazy hrozie Khazohpa khozie hawhta chhihtha n‟awpa
4. Awnanopa ku phei hmâtlâhpa châ awpa
5. Thyutliazy Khazohpa bie nata hla liata akaona pathaihpa hnei thei nawpa
6. Khitlâh liata bao a ngiahpazy deichhy awpa
7. Hmo phapa padua awpa
8. Hlapy phapa padua awpa ta,
9. Mo hropazy Krista lâ a chhi awpa ta achhuahnazy he a châ.[6]

MIEC nata MIC achhaina

Kô 1968 tawhta eima Awnano-pa moh a châpa LIEC tahpa he MIEC tahpa moh a vaw panono haw. MIEC Assembly ei (8) na cha 1968 February 21-25 nohta Zyhno liata taopa a châ. A yzie cha 1968 taih he ta Saikao nata Vasai Awnano zy he hmaohkha ta ama chakao khoh lymâ tahna a châ. 1968 tawh heta Burma MIEC he Assembly eihpa hnei awpa ama vaw hia pathao haw.[7] October 5, 1970 on Monday liata Mara Independent Evangelical Church (MIEC) tawhta puapa ta (MIC) Awnanopa Headquarters cha Lialaipi liata paduapa a châ. Cha noh tawhta MIC Assemby ryureina a eihpa chhao hnei hawpa a châ.  March 21-23, 1973 (MIEC Assembly, Siaha) liata 1968 tawhta Myanmar Mara Awnanopa (MIEC) Assembly a eih ta ta hnei thei awpa hiapa kyh report ta, a eihpa ama hnei thei awpa a vaw pasaih haw.[8] A yzie cha India Mara nata Myanmar Mara Awnanopa cha 1973 tawhta atanoh taihta Assembly ryureina eihrâhpa a hneipa ama vaw châ haw. Chavâta Marapa cha, India (MIEC), Myanmar (MIEC) nata Myanmar (MIC) tahpa Awnanopa sâ (3) lâta ama chhaih khai haw. Myanmar (MIEC) nata Myanmar (MIC) ta amâ chhaih chhôh ta “Krizyhpa Thyutlia Py” (KTP) he Fellowship Department ry liata phupy hawhta châ ta, he chhôh ta record sianopa eima pahno thei khao leipa he ngiachhie eima ta hmeiseih.

MEC KTP â vaw duana

January 12, 1987, Lialaipi Assembly liata MIEC nata MIC kô 16 chhôh a vaw chhaih hawna tawhta a vaw pôhkha ta, Awnanopa moh chhao Mara Evangelical Church (MEC) tahpa pananopa a châ haw. Cha Assembly liata (1) KTP ryureina â sâh chaipa sâkha a hnei aw. KTP Pakhypi (Centre) tahpa ta moh biepa a châ. Cha liata Secretary

cha ES KTP châ awta, Chairperson nata Vice Chairperson ta ryureina ama sie khei aw. (2) Bie pathlupa zydua ryureina liata pachhâsa khaipa a châ. Pachhâsa thei leipa cha Assembly EC siepahliepa ta Assembly lâ a tlô khei aw,[9]tahpa ta paryhsapa a châ.

Kô 1988 (MEC Assembly, Sabyh) ta KTP chhithana (by-law) a pypa ta, cha liata ei (1) na KTP Centre Ryureina eihpa chhao hnei theipa a châ. Kô 1989 (MEC Assembly, Sabyhpi) liata ei (2) na KTP Centre Ryureina hnei theipa a châ heih. Assembly lâta KTP Pakhypi eihpa hnei thei mâh leina duahmo tawhta hnei thei awpa ta a py kheipa a châ. Kô 1990 liata ei (3) na KTP Centre Ryureina nata Pakhypi Conference cha Râritlâh Local Church liata hneipa a châ. Chavâta KTP Pakhypi eihpa cha Raritlâh liata hnei tua chaipa hawhta eima rei thei. Cha Conference, Râthiehpa, lia Ks. 30000/- ta kyhchhi taopa nata KTP Branch to liata campaign y thei sala tahpa a vaw paryhsa. Kô 1990 tawhta KTP Pakhypi eihpa hnei thei haw bâpa châ ta, ryureina report chhao Assembly lâ pie tyhpa a châ.[10] KTP a vaw duana kô 1947 tawh a laichadaipa ta January 22-25, 1998 (Sabyhpi) liata KTP Golden Jubilee Pakhypi cha a rôhna kawpa ta patlô theipa a châ.

KTP Pakhypi moh pananona

KTP Secretary eihpa ama vaw hnei tawhta khizaw awnanopa chhithana ziezy a chu pha lai lymâ ei ta, kô 1995 MEC Assembly paryhsapa nata a pypa dâh & ryhpa liata KTP Department Ryureina “Centre Conference” cha “Joint Conference” moh paphaopa a châ. Cha moh pananona cha January 25-29, 1996 (Meisakôtlâh) KTP Pakhypi liata hmâ pathaopa a châ.[11] November 9-12, 2011 liata taopa MEC Special Assembly ta Dâh & Ryhpa mopasia heih ta “Joint Conference” cha “Central Conference” tahpa moh panano heihpa a châ. Cha moh cha January 26-29, 2012 KTP (Ma U) Pakhypi liata hmâ pathao châ ta, atanoh taihta hmâ pazao lymâpa a châ.

KTP Pakhypi nata eima Ryureina moh cha a vaw nano laih hrasala ryureina eihpa hnei awpa ta bie paryhsana cha MEC Assembly 1987, Lialaipi tawhta a laichadaipa ta January 2012, kô (25) na Silver Jubilee nata Central Conference pakhypi cha Ma U Local Church liata tao theipa a châ.

Secretary nata Chairpersonzy

Kô 1988 tawhta KTP cha ryureina eihpa hnei thei hawpa a châpa liata Assembly ta KTP Secretary eihpa pie thei mâh leipa vâta Program Secretary châta Rev. M. Vahnei (1988) nata Rev. D. K. Hiechai (1989-94) zy ta ama vaw chakao. Kô 1994 Assembly EC (Hlôma) ta KTP ta Secretary eihpa hnei thei awpa ta khohna cha a pyh kheipa châ ta, Pro. P. Lathai he (May 1, 1994) liata KTP Secretary châta chakaona rai pahniehpa châ ta, atanoh taihta Secretary hnei pazao lymâpa department vaw châ haw. KTP Secretary nata Chairperson zy cha:

1. Rev. Lathai (1995-2003)
2. Rev. Sa E hmo (2003-2004)
3. Rev. Dr. Zodau (2004-2008)
4. Rev. Vazilai (2008-2010)
5. Rev. Lechau (2010-2012)
6. Rev. Khaibie (2012-2016)
7. Rev. Beilawkhai (2016-2020)
8. Pro. Pastor San Lwin

MEC KTP Chairperson-zy

Kô 1988 liata MEC KTP cha ryureina eihpa a hnei thei hawpa chhao ta, kô 1991 taihta Program Secretary ta Ryureina ama sie khei. Kô 1992 tawhta officially ta Chairperson atly patlôhpa ama châ. Chanahzy cha;

1. Mch. Biezi, Hlôma (1992-93)
2. Mch. Rechie, Pârâ (1993-94)
3. Mch. Nawtha, Ngephepi (1994-95)
4. Mch. Laithei, Sabyhpi (1995-96)
5. Mch. Silao, Malâ (1996-97)
6. Mch. Dawkô, Satu (1997-98)
7. Mch. Chhaitu, Sabyhpi (1998-99)
8. Puhpa. Zawma, Sabyh (1999-00)
9. Puhpa.Biechei, Sabyh (2000-01)
10. Mch. Labie, Dawlei (2001-02)
11. Mch. Raki, L. Station (2002-03)
12. Mch. Vahnei, Hlôma (2003-04)
13. Mch. Râki, L. Station (2004-10)
14. Puhpa Thauvô, Lelai (2010-2012)
15. Puhpa. Khaichô, Lochei (2012-2014)
16. Mch. Vaha, Aru (2014-2016)
17. Mch. Khaimau, Meisakôtlâh (2016-2018)
18. Km. Malao, Sabyh (2018-2020)

He nahzy he KTP Department eihrâhpa ta a vaw dua tawhta Department chairperson ta ngâchhih ngaita ta a vaw chakao hawpa chhituh penawhzy ama châ.

Châbu mohpazy

[1] “KTP Special News”, June 10-1/95

[2] Nôhro, Ambassador for Christ: Special Issue (Siaha: ECM Publication, 2017), 43.

[3] Nôhro, Krizyhpa Thyutlia Pa zy Thâtih (Siaha: ECM.Publication, 2000), 2.

[4] “KTP Special News”…,

[5] Nôhro, Ambassador for Christ: Special Issue…, 43.

[6] Nôhro, Krizyhpa Thyutliapazy Thâtih…, p. 2.

[7] L. B. Siama, Mara Awnanopa ta Razohpa a chakaotuana noh (Sabyhpi: MEC Publication, 2017), p. 8.

[8] Victor Ve U & Hralei, Mara Evangelical Church Pina nata Laiseihna (Sabyhpi: MEC No. III Ryureina committee, 2011), 67-68.

[9] “KTP Annual Magazine, Golden Jubilee Special”, (1997-98), 13.

[10] “KTP Annual Magazine, Golden Jubilee Special” …, 13.

[11] “KTP Special News”…,