Ei (47) Na MEC General Assembly hlaotlopa ta hma khai haw

Posted on March 30, 2018 Posted By: MECCategories: News

“Abeipa Khazohpa moh tlao a palai khei ei si” (Hlazy 20:7) tapa biepipa hma pata taopa Ei (47) Na Mara Evangelical Church General Assembly cha Locheita khi liata March 2, 2018 (Friday) tawta pathaopa châta hlaotlona byhna hlupi tona chôta March 4, 2018 (Sunday) noh zâcho daw 12:00 am ta Abeipa moh ta pachhâpa acha.

Khichhai a vaw tlô theipa zydua 1003 pha eita, Pastor a vaw tlô theipa zydua cha MEC Pastor 38 nata ECM Pastor 1 (Rev. Beikhochhi, ECM delegate), CCIM pastor pa 1 (Rev. Nohu, CCIM delegate), Baptist pastor mo pa 4, (Baptist Association of Maraland tawta pa 2, Rev. Renau-Ex GS nata Rev. Siama – Locheita Baptist local church biatuhpa, Rev. Ketha – Khuabung Baptist local church biatuhpa nata Rev. Kham Nawl – Ngalang Baptist Local Church biatuhpa) zy ama cha. Assembly ahlao theipa Awnano Macha zydua 224 ama pha.

ECM delegate mo pa 3, Rev. Beikhochhi nata Awnnao Macha pa 2, CCIM delegate mo pa 3, Rev. Nohu nata Awnano Macha pa 2 zy, Co-opted member châta hruapa Mc. Thahe Chozah nata Mc. Dr. Sasa, March 3 za a pakhyna liata sermon tao awpata nata observer chata hruapa Rev. Renau (GS, BAM), Rev. Siama (Locheita Baptist local church biatuhpa), Rev. Ketha (Khuabung Baptist local church biatuhpa) nata Rev. Kham Nawl (Ngalang Baptist Local Church biatuhpa) zy Assembly ama hlao theipa vata eima chô liata alyna eima hnei.

Assembly ryureina cha MEC achhyna o liata March 2 nata 3, noh 2 chhô hneipa châ taraw ta daihti la via awpa a ngiahapa vata March 4, 2018 pahanoh my a pakhy khai tawta ryureina hnei pazaopa châta za daw 4:00 pm ta hlaotlo kawpata pachhâpa acha.

Assembly ryureina liata pahno awpa a phapa or History sakha ama panano hapa cha MEC ta ko 20 hlei a zahmatyhpa noh peimawpa Râthiepa noh kha September 3 noh ta hmakhao leipata August 1 noh ta hma ba awpata a parysa haw. August 1, 1966 noh he Marapa ta thatihpha chhona lâ a sie tua noh achâ tapa research hlupi tao khaipa tawta pahno papuapa achâ vata he hawta pananopa acha. Chavata tako 2018 tawta cha MEC, ECM nata CCIM ta Rathiepa noh a hmana noh alyu khai ba aw tana acha.

Tako cha Assembly officers atlyna kô achâpa vata Moderator nata Deputy moderator atlyna hneipa châta 2018-2010 term Assembly officers châta atly patlôpazy cha Moderator châta Rev. Satu Ve-u nata Deputy Moderator châta Rev. Biehlo (Deputy Moderator) zy ama cha.

Moderator Rev. Satu Va-u ta March 4, pahanoh a pakhyna liata Probationary pastor mo 4 pa-ina a hnei. Chazy cha: 1) San Naing Lwin (Myokhaw Khami), 2) Soe Khaing (Pasei khipa, Asho chin liata chakaotuhpa), 3) The Lung (Lemrochin) nata 4) Ling Aung (Hletu field) zy ama cha. Amo he Mission field chhô liapazy ama cha.

General Secretary Rev. LB. Siama ta kyhpachâna raihria liata nata achuna liata a tao patluapazy hnota palyuplina ryucha piena ahnei. Palyupalina ryucha piepa zycha achuna liata Ph.D a hmo theipa Dr. Khavatha nata Dr. Nay Aung, nata H1N1 pasana hri a pakhapa hmaohuna (Mask) Myanmar rah chho liata a rai papuatuhpa, Myanmar sawkha nopawzy ta alyna cha ama piepa Dr. Sasa zy ama cha.

Assembly ryureina hnei chhôta zawpi cha Baptist achhyna o liata a pakhypa châta, za apakhyna deikua pakhypi a hlaopa zydua, khichhai- khichho hmaokha ta a pakhy lymapa acha. Sermon a reituhpa zyta Biepipa “Abeipa Khazohpa moh tlao a palai khei ei si” tapa atlychaka pata rei lyma eita, ama reipa sermon ta zawpi ngiapâna tha a patlô hmeisei. Bible study chhao noh 3 chhô, my daw 6:00 am tawta 7:30 am tai hneipa acha.

Sermon a reituhpa nata Bible study a pietuhpa zy reipa bie liamari chaipa cha, “Ta noh taita Mara awnanopa byhna pieta a chhithapa cha Abeipa Khazohpa acha. Chavata Khazohpa deileipa ta Marapa ta à palai khei awpa hropa y vei. Khazohpa moh a palaikheina tana cha Abeipa Zisu a ngiapâ ta kyhto, kaoto liata Abeipa bie zy ta, Amo achaba ta, Amo ta hrona nata hmotaona acha.”

KTP Tisi hlapy (ECM), Siasi KTP (ECM) hlapy, BYF Ngalang hlapy, KTP Locheita hlapy, KTP Ngephepi hlapy nata mo pakha hlasana ta Abeipa palyupali chyu eita Abeipa Zisu moh ama parônasa hmeisei. Khichhai dy awpa nata achhô liata patôpatia awpata KTP Tisi (ECM) hruapa châ eita, ama hlapy nata dyna hla ama sapa a pha hleikho ta Apakhyna o ama pangiapalipa a pha thei dah cha paka ta rei papua theipa châ vei. Thotlâ khi liata khatlu ta ama tobi thei thlahapa cha ngiapana vata nata khopasana vata acha. (Ary liata tawpa nothlahpa he mo pachhi ma y). Ryureituhpazy nie awpa Viachha, Awti nata Thopi zy pachhuapano lyma eita hmopha ama tao hmeisei. Abeipa ta KTP Tisi he byhna pie mawh sy.

Locheita khi cha MEC nata Baptist yna khi acha taraw pata Mara awnanopa châna hmiapasa pata lôkha phao pata hmaokha ta Assembly ama patlôpa vata nata a khisaw ta ama daihti nata ama hneina zydua pahryu pata kyhpachâna palôphaona chôta Ei (47) Na MEC Assembly ama patlôpa vata ama chô liata maraec.org ta alyna bie a rei hmeisei. Ei (48) Na MEC General Assembly cha Peite (A) khi liata a paha aw.