MARA EVANGELICAL CHURCH
47^th Theological Seminar
BIE SYPAHMAOHPA

 47^th MEC Theological Seminar cha 2017 Dec. 7-10 taihta Pasai local liata taopa a châ. Cha liata MEC local church (22) tawhta pastor (25), awnanopa machâ ( 59 ), khihchhôh macha (43), chakaotuhpa nata a zydua (227 ) tlôpa, khichhôh zydua chhao ta Seminar cha taopa a châ. Seminar biepipa cha “Khazohpa Ngiachhiena to mohôhna” (1Pity 4:10) liata a duapa ta paper sa 4  rei papuapa a  châ. Rev. Dr. Zôdau (BTE Director) tawhta “Awnanopa thlapa hro mohôhna”; Rev. Maiki (TSD Director) tawhta “Pohkha, chhôhkha, khihtlah mohôhna”; Macha Zasaw (Assembly Treasurer) tawhta “Awnanopa sôh mohôhna”; nata Rev. Victor Veu (Associate General Secretary) tawhta “Ngaipâna nata Phohro” tahpa paperzy reipa a châ. He paper sa palihzy reipahmaohna tawhta he hawhta bie sypahmaohpa a châ.

Kô 110 chhôh MEC awnanopa ta Khazohpa ngiachhiena byhnâ a topa – Mara Holy Bible, Mission chakaona, Mara Awnanopa avaona Constitution, Assembly sôhnawhzy, chakaotuhpazy, khihtlâh, chhôhkha nata sahlao – zydua he awnanopa phapa (ideal church) paduana châta Khazohpa ta maniah a piepazy ama cha. He zydua he ngâchhihpa nata zôpha kawpa ta kyhpachâna ta thei patheina nata hmâtlâh châna taih ta mohôh awpa a châ.

1. Khazohpa bie he “ato liata ato hnawh” a châpa pahnopasiapa ta chhôh to ta Biehrai reina nata thlachhana programme hnei lyma awpa eimâ chhuah.
2. Mission Golden Jubilee khô lâta mission eima chakaona he zituhpa taona châtaw ta chakao ba awpa eima hlâ.
3. Awnanopa phapa padua awpa abyuh haw tahpa pahnona chôta, local church ta pastor phapa papua awpa ta mohôh sala, pastor chhaota awnanopa phapa padua awpa ta a chakao aw tahpa liahsa eimâ paraoh.
4. Awnanopa pitlohpa nata â-ipa ngiana a châpa constitution he Mara awnanopa mohôhna châta papeimawhsa ta zi lyma awpa a châ.
5. Awnanopa sahlao zydua kyh to liata amopâtlâh nata Khazohpa hmâtlâh eima cha via thei nawpa ta sasyh a pathaisa awpa eima chhuah.
6. Awnanopa phapa padua thei nawpa ta, sasyh châna, taovyuh (maophaona) nata tovyuh a pahno tua awpa a byuh. Chhôhkha nata khitlâh nata râh hmasiena nawpa ta a chhuahna sianopa hneipa chhao a byuh. Cha pitloh thei nawpa ta “Chhôhkha Hmasiena Committee” hnei awpa ta eima paraoh.
7. Khazohpa tawhta ngiachhiena byhnâ eima topa zydua he Ano awnanopa mohôhna châta Khazohpa ta miah âhnaw tahpa pahnopa ta, MEC awnanopa mohôh pha lyma nawpa nata sôh daihty lei nawpa ta “Budget Estimate system” hmâpa a châ. Chavâta cha system nata ahmiepa “Target System” chhaohe hmâ thei nawpa ta achu pathao bâ awpa ta khokheipa a châ.
8. Khichhôh awnanopa nata râh awnanopa a-ipa ta asie pazao thei lyma nawpa ta sôhnawh thiehpa châta “local sadô” hnei chyu awpa ta eima paraoh.
9. MEC central bank (Sôhnawh) cha local church ta MEC awnanopa pohpalôhpa mohôhna liata tlala lei nawpata a daihti ta liata sôh hlâ thei lyma awpa ta eima chhuah.
10. Eima ngiapâna nata ahmie khao leipa phohrozy he Khazohpa bie hmâpa ta paryh lyma awpa â byuhpa ta eima pahno. Chazy cha: chyhsa pathaihpa nata pathaih leipa tahzy, chanôzy mopahnaina, sa thisaih palopa ta aryhna taona, …. hpz a châ.

Seminar Bie Sypahmao (PDF)