THLAHPA HRO PASATUHPA PASTAW
Rev. Dr. Zôdau

 BIEHMIAPA

 Atakô 2017 MEC Pastoral Conference liata “Thlahpa hro pasatuhpa pastaw” tahpa châpaw ro ta rei awpa tovyuh ei vaw to hrapa vâta ei ly ngaita kaw. Anodeikua thokhazy ei chi cha keima hlâta uthei viapazy châ ei chita, thokhazy ta keima hlâta hmôpa theipa ahnei viapazy nama châ vâta nama hry ta he hawhta châhna a reih tlâhpa chhao ta a hmô vana. A deichhyna ta he châhna reina he ei na sydy awpa ei chita ei cha haw ei.

Burma sawhkhâ cha democrasi chhithana liata a vaw y haw hrapa vâta a chyhsazy chhao ato kyh liata ama vaw khotalai via haw hra. Cha hleikhô ta eima râh liata phu nata py NGOzy politi phupy zy chhao a vaw y haw. Cha hmozy cha ta zawpi châta hmo phapazy a tlôkhei ngapa hawhta Pastawzy chakaonazy chiehleina nata phahlana zy a vaw palâsa lyma. Kaohro lâ tawhta reipa a châ khiah pheisaih sawhkhâ liata cha pastawzy cha khapa eima châ leipa chhaota zawpi ta amâ pahnieh kawpazy eima vaw châ tyh. Atahma deikua chyhsazy a pahniehna eima pahlei pathao haw. Pheisaih sawhkhâ daihti liata pastawzy cha zawpi palôh liata a lâ kaw tyh hra sila, atahma deikua chyhsazy palôh liata pastawzy vâna eima pahlei pathao haw. He hawhta zawpizy cha pheisaih sawkhâna ai kaw ba eita, chô lâ tawhta biehneina nata chhithana chhao ama paaisa kaw ba hra. A panawh leipa pastawzy su ama hnei thei khao leina daihti a châ.

Mara Gospel Centenary khô lâ MEC awnanopa nohthlahpa a nano lymapa hawhta MEC pastawzy chakaona dâh chhao a nano lyma awpa a châ. Tilaipi khô lâ ta khihtlâh awnanopa mia 11 hnei haw pita, khipi liata khitlâh awnanopa mia 14 eima hnei haw. Eima mietaku sadôzy cha khitawpa liata dei châ leipa ta khipipa liata chhao a vaw châ haw. Khipi nata khitawzy a tloh theipa pastawna dâh chhao maniah ahnaw haw hra. Cha hawhta MEC râh liata a chakao awpa pastaw heta computer hria thai awpazy, email nata facebook zy hria thai awpa chhao a vaw hnaw haw tyh. A eih viapa ta khipi awnanopa liata chakao awpa pastawzy cha mawtaw saike nata mawtaw zy haoh thai awpa chhao âbyuh haw bâ hra. Rei khohpa cha chhâ a sie haipa a chadai thei khao leipa pastawzy pi cha rairuna eima tyh hmeiseih haw ba.

He hawhta awnanopa duahmo anano ngapa liata a ypa mietakuzy a pasa awpa pastaw hmisâ chhao â nano ba hra awpa a châ. Chavâta Mara Thâtihpha Kôzabi 2007 hlâta pastaw ngâchhihpa hmisâ nata 2007 chô lâ pastaw ngâchhihpa hmisâ cha â nano bâ hra awpa a châ. Chavâta he châpaw heta atanoh Khazohpa mietakupa pasana raihria liata eima tyh haipa rairunazy mopa ta Khazohpa biehrai tawhta a duapa ta “Pastaw ngâchhihpa hmisâ” nohthlahpa si awpa a chhuahna a hnei.

1. AWNA A PAHNONA : Pastaw Chakaona Thabypa

 Pastawpa cha awnanopa raihria chakaotuhpa châta Khazohpa awna a pahno awpa a châ. Awna deikua cha vision ta tlyma, ei thei lei awpa peimawhna ta tlyma a châ thei aw. Awna a pahnona heta pastawna liata pakôpazinazy, alôhnazy, tiamanazy nata hnabeiseihnazy maniah a pie tyh. Pkn. ta pastaw pakha ta awna â pahnopa vâta khei hawhpa su hropa zy liata âthôh viapa a y thlah hapa chhaota pastaw chakaona a pakôpazi lylia. Khazohpa ta a awpazy cha bie â taih pâ tyh hra ei. Abraha cha Khazohpa ta a aw nota phopi paw châ awpa ta bietaihna a pie pâ (At. 12:2). Mawsi chhao Khazohpa ta aw ta, a hnôhta ypâ lyma awpa ta bie â taih pâ hra (Pu. 3:12). Zisu Krista chhaota a pachupazy aw ta, a tua nota ta nama hnôh ta ei y lyma aw a tah (Mt. 28:20). Khazohpa ta a awpa zy cha saduthliepa chhao a pahmôsa hra ei. Abraha cha Khazohpa ta “râh a pamosa awpa lâta” sie awpa ta hnabeiseihna a pie ei (At. 12:1). Mawsi chhao cha Kana râh lâ Izarei nawh siekhei awpa he a châ. Cha hawhta saduthliepa liata hnabeiseih awpa a châ. Khazohpa ta pastaw cha a aw tita a chakaona awpa ta chhaichhi a pavaosa pâ lyma hra aw. Cha chhaichhi chhao cha pastaw ta ahnei chiehpa liatapa kha a châ tyh. Pkn. ta Mawsi châta chhaichhi cha ano ku liata a ypa “chôchahrei” (Pu. 4:2) a châ. Pastaw cha ano ta ahneipa athaina tlyma, athatlôhna tlyma, achâna tlyma Khazohpa ta ahmâ awpa a châ. Pastaw ku liata a hneipa chhaichhi cha a pastaw chakaona châta â daih thlah haw tahpa pahno thai awpa a châ. Khazohpa ta ano raihria chakao awpa ta a aw tita, thokha châta cha ama pahâna eihhrâhpa chhao a pie hra ei. Pkn. ta Rev. C. Thaulei cha a pastawna liata “tlâhlei chiehlei vaina” liata byhnâ a to patluapa hawhta a pypa a châ. Cha hawhta Rev. A. Rakhai cha thâtihpha chho chakaona liata byhnâ a to patlau viapa hawhta hmôpa a châ. Chavâta Khazohpa awna a pahnona he pastaw pakha a chakaona châta peimawh kawpa a châ. Achhâpa cha he Khazohpa awna a pahnona tawhta thabypa ta tiamanazy, pakôpazinazy, alôhnazy nata hnabeiseihnazy eima hnei tyhpa kha a châ.

Khazohpa awna cha dâh nata ryhpa chhôh liata pa-i awpa a byuh. Cha pa-ina cha atahma MEC ta ahmâ haipa chakaona bu bô 17na (Probationary Pastor Pa-ina) nata bô 19 (Pastor chanaona) zy he a châ. Pastor châ awpa ta Pro-pastaw pa-i leipa y tla leipa pita, cha tawhta Ordination council paryhsazie hawhta pastaw tlohpa ta chahnaopa eima châ. Miakhana liata khapa vâta ma Khazohpa awna cha awnanopa dâhryhpa liata pa-i awpa a byuh? Awnanopa cha hmo ânapa ahneipa vâta a châ. Pkn. ta MEC cha hmo ânapa miano a hnei: Batina nata Abeipa Tlâhkhai akaona zy a châ. He hmo ânapa hneipa heta awnanopa cha phupy hropa NGO nata MTP, MSA, MChP tpz… zy nata alyu leina a tao. Chavâta pastaw cha hmo ânapa nata hmo baoh pathaihpa ahneipa awnanopa a chakaotuhpa a châ. He hmo yzie heta pastaw pakha cha sâlâ kawpa ta a y chakhyh thai leina chhao kha a châ. Khodâh ta chakao, khohdâh ta a phie a tah thai leipa kha a châ. Zachhihna ta chakao awpa a châ. Mianona ta pastaw cha awnanopa a sawhkhâna liata pa-i chahnao tahpa a byuhpa cha awna chhâpa bietaihna a châ. Abraha cha Ur khihpi tawhta awpa châ ta (At. 12:1-3), cha awna cha biehraina ta a pa-i heih (At. 15:1-16). Chavâta pastaw châta pa-ina nata chahnaona he awna pa-ina tlao a châ. MEC ta pa-ina bietaihna liata bie hiahrina mia 14 ahnei. Cha bietaihna Khazohpa hnôhta awnanopa hmiakô liata liahsa a palâhâhpa ta Khazohpa awna cha âdo tlaina tahpa ta phualuahna chhao a châ. He zydua he pastaw pakha ta a chakaona liata athaby tyh awpa châ.

2. KHAZOHPA BIE: Thlahpa Hro Mohôhna Chhaichhi

 Pastaw pakha ta a mietaku sahlaozy a pasa tita miakhana liata a peimawh chaipa chhaichhi cha Khazohpa bie a châ. Chavâta pastaw pakha ta Khazohpa bie ahneipa a châ awpa a châ. Khazohpa bie awnanopa hro liata peimawh chaipa a châ. Chyhsa pakha hrona liata a peimawhpa viahchhâ, ti nata thlih zy a châ aw. Chazy hawhta thlahpa hro liata a peimawhpa cha Khazohpa bie a châ. Cha cha Zisu bie liata eima pahno, “Chyhsapa he viahchhâ deita ta hro aw vei ei, Khazohpa pakah to bie a puapa deita ta ama hroh aw” (Mt. 4:4) a tah. Zisu Krista cha râhpathohpa liata noh 40 nata zâ 40 nie leipa ta y nota ano châta viahchhâ hlâta Khazohpa bie tlao a peimawh viapa ta a hmô. Chavâta chyhsa hro liata viachhâzy tizy nata thlihzy hlâta Khazohpa bie he a vaw peimawh via haw. Thlahpa hro mohôhna liata cha, Pity nata Zawhana chhao kha kudaopa patlâ nawpa ta tâka nata ngô khapa hma hnei vana, chahrasala ei hnei chhôhpa ei cha pie aw, Nazari Zisu Krista moh ta phei ta sie teh” (Ht. 3:6) ama tah. Lyuchâ Pawla chhaota,  “Kawrini awnanopa sahlao cha sâh châ leipa ta sâhpiti ta ei cha pasa ei” a tah hra (1Kaw. 3:2). Eima mietaku pasana châta ta Khazohpa bie cha pastaw ta ahnei cheingei awpa a châ. Pastaw ta a mietakupa pasana châta Khazohpa bie a chakâhsa awpa châ vei. Awnano chakaotuhpa cha Khazohpa bie chhaichhi ahnei awpa a châ.

Pastaw pakha ta pheisaihzy ta adyuhna chhaichhi ama tobipa hawhta Khazohpa bie he a tobi awpa a châ tahpa ta Pawla ta a reih (Eph. 6:10-20). Pastaw cha pawliti akhaihpa hawh ta tlyma châ leipa ta, sapa nata thisaih a dyuhpazy châ hra mapi. Biehneina nata ryureina zy chô liata moleina tlao â dyuhpa eima châ. Cha khiah, pastaw raihria cha moleina reipasaona adyuhtuhpazy tlao ama châ hri. Cha moleina adyuhna liata a tobi awpa chhaichhizy cha: biehmeiseihpa chaisaih, siana chachôhna vyhphao, adyhna thâtihpha pheiky, ngiapâna vyhphao, pachhana lakhu, thlahpa zaozi Khazohpa bie, nata thlachhana zy ta a tobi awpa pasyupa a châ. Cha chhaichhi hry liata Khazohpa bie chatai he a chariahpa thiena awpa châta a peimawh via pachai. He pheisaihpa heta a dyuhpa cha achô liata adyuhna chhaichhizy vâta riapha kawpa ta a y thei aw.  Chavâta pastaw cha pheisaih pakha hawta adyuhna chhaichhi pakipa ta a tobipa a châ awpa a byuh.

Pastaw pakha cha Khazohpa bie pahnona liata Skawla hawhta a y hra awpa a châ. Ephisi awnanopa liata pastaw ngapa Timothy hnôhta châ rohtuhpa ta Timothy cha, “Khazohpa hmiakô liata nama sasyh ta a pha chaipa nata raihria phapa, zakhei lei awpa ta a tao la, Khazohpa bie adopa ngaitapa ta a khâsiatuhpa” (2 Tim. 2:15) a tah. Pachuna do leipa nata bie thlathlipa liata aei achhiana hro atyh haipa liata Timothy chô ta khokheina a châ. Pastaw pakha cha Khazohpa bie pahnona liata a phahla awpa châ vei. Ngiapâna kyh liata tlyma, pachuna kyh liata tlyma awnanopa vaina nata pasana châta a daihpa Khazohpa bie hnei awpa a châ. Biehrai athaipa Skawla ama tahpa cha biehrai reina dâh, sermon taona dâh, nata Khazohpa bie phuahna dâh a pahnopa he a châ. Biehrai reina dâh cha Biehrai liata a ypa Khazohpa bie thuapapuana dâh a châ. Awnanopa cha noh chareih ta Khazohpa bie tha a patlô nawpa ta Khazohpa bie thiehpazy eima thuapapua thei khiah tala Awnanopazy ta Khazohpa bie achuna liata noai tah aw veih ei. Pastaw pakha ta a khichhôh awnanopa liata peimawhna nata ahmiepa ta Khazohpa bie cha a phuah thei cheingei awpa a byuh. Ama hriiah hawhta thohna pie thai awpa nata ama laiseih thei nawpa ta thlahpa pati eima pie thai awpa a peimawh.

3. THÂTIH BU: Pastaw Chakaona Chavei Chhaichhi

 Thâtih a patheina he pastaw pakha chakaona liata alei thei leipa a châ. Atahma ta eima sie haipa he thâtih a patheinasa chhâ tahpa a châpa vâta. Na ku chachâh lâta Biehrai nata na chavei lâta Thâtih Bu chaba ma y, khatlu ta ma khizaw liata Khazohpa bie aki ngâ tahpa na pahno thei nawpa ta tahpa athaipazy ta ama reih. Chhâ ta maniah a siekhei haipa hawhta thâtih bu ta eima bohna nata thatlôhna a châ. Thâtih bu heta khizaw liata Khazohpa raihria eima ngiana a châ. Râh liata pawliti ziza pahnopa a byuh ta, sawhkhâ siekhei haipa pawlisi pahnopa a byuh ta, khihtlâh liata hmo a chhichâ haipa chhao pahno awpa a byuh. Khihtlâh liata byhnâ tona kyh nata vâchhiena kyh pahno awpa a byuh. Khazohpa lâta alyna bie hlâkhei awpa nata Khazohpa hnôhta reiphacheikhei awpazy eima pahno thei aw. Khitlâh thâtih eima phahla khiah thlachhana awpa hma pahno thai ngyu aw mapi. Chakaona bu nata chhithana bu liata palâsa khaithai khao leipa hmozy cha noh chareih thâtih apatheina ta maniah a chho aw. Noh chareih ta hmo yzie eima chu leipa khiah khizaw a chadai thei khao leipa eima châ aw. Chavâta telephone, internet, facebook, nata thâtih bu zy tawhta khih nata râh thâtihzy, khizaw thâtihzy a chu awpa a byuh. Khitlâh thâtihzy he eima pasa ngapa awnanopazy hro thâtih a châ. Thâtih bu vâta daihti nata châh, tâka phusa chhao pachha awpa chhao abyuh haw. Cha ta leipa khiah, Khazohpa bie khatlu ta ma he khizaw liata a ki haw tahpa pahno khao aw mapi.

CONSTITUTION: Chakaona Châta Biehrai Mianona

 Mongyuh râh liata cha, “Biehrai Parohpa ta ‘Thus says the Lord’ a peimawhpa hawhta, khitlâh ryureina liata ‘thus says the Law’ tahpa a peimawh” ama reih. Râh pitlohpa nata râh hmasie viapazy ngiana miakha cha dâh nata ryhpa ama zana he a châ. Cha hawhta awnanopa pitlohna ngiana cha dâh nata ryhpa zana he a châ hra. Awnanopa laiseihna thliena liata hawsaihpa awnanopa cha tlahpa hmosai piepa pasâhsana liata thliepa a châ  tyh. Cha hawhpa awnanopa liata palainazy sasyh a reithainazy, a reipachhienazy, ôh thainazy a y tyh. Biehrai awnanopa eima mo tita Kawrini awnanopa duahmo a châ. Biehrai athaipazy ta ama reipa cha Timothy daihti liata Ephisi awnanopa cha awnanopa pitloh chaipa a châ ama tah. Chavâta Timothy châbuzy he Pawla ta a ropa châ thei aw vei ama tahpa a châ. Achhâpa cha awnanopa tôh nata tlâ, dâh nata ryhpa a i kaw ta AD 300 rachhôh awnanopa duahmo a lyu vâta a châ. Chavâta awnanopa dâh nata ryhpa azapa awnanopa cha pitloh awnanopa tah lyma awpa a châ. Awnanopa dâh nata ryhpa cha awnanopa aboh thei nawpa ta kudôhpa a châ. Zisu Krista ta reih ta “Kei cha mietaku vaihtuh phapa ei châ” (Zh. 10:11). Zisu ta mietaku vaihtuh phapa a châna cha a mietakupazy a pabohsana liata eima ngiana thei. “Kei he mietaku ochhi cha ei châ” a tah (Zh. 10:7). Mietakupa sadô liata ochhi leipa lâta angiahpa cha paruhmapa nata phihmapa ama châ. Mietaku paru ta parao ta thie awpa ta a vypa a châ (Zh. 10:10). Chavâta Zisu Krista cha eima mietakuzy a bohna dahryhpa a châ. Awnanopa dâhryhpa za ta a chhihtuhpazy cha pastaw phapa cha aw eita, awnanopa dâhryhpa saw rei leipa ta a siethlu a chhuahpazy cha MEC mietaku sahlao châta phihmapa nata paruhmapa a châ. Awnanopa dâhryhpa he mopakha a ropa châpaw hawhpa châ vei. Assembly ta a pypa zawpi eih a châ. Paryh theipa châ ta, anodeikua aki leipa chhaota hmâ haipa cha ahropa a châ. Awnanopa dâhryhpa tahpa he “constitution” (MEC ta ahneipa bu hrohpa) dei anyu vei, chhithana bu nata Assembly biepathlupa zydua a pahly khai. Chavâta awnanopa dâhryhpa zana cha ta awnanopa abohna nata awnanopa pitlohna zy a palâsa. Pastaw phapa cha ta awnanopa dâhryhpa zana ta awnanopa a pabohsa lyma awpa a chhuah tyh.

5. SASYH TA APAHNONA: Chakaona Châta Resource

 Mohropa eih pahnopa hlâta keimo awnanopa thâtih pahno awpa a peimawh. Nôpaw bie ta, “athyu akiana hmâhta a pahno vei” tahna cha machhie tahna a châ aw. Biehrai athaipazy ta ama reipa cha Maka ta Zisu thyukeina kyh a rei leipa cha Zisu cha sei ta a taopa tahpa ta a chhopasia khohpa vâta a châ ama tah. Cha hawhta Mathai ta Zisu cha Zuzy beipa ta a chaluah khopa vâta Zisu Krista thyukeina a palâsapa a châ tahpa ta ama reih hra. Chavâta eima awnanopa thâtih pahnona phahlana heta awnanopa nohâh yna a tao. Rev. LB Siama ta 2013 April thla liata MEC Thatlang khihchhôh awnanopa ama pahy nota MEC thâtih cha a sia ngaitapa ta reina hnei ta, cha tawhta zawpizy (Baptist liata nôpawpazy nata Thatlang khihpi liata nôpaw hruapazy) ta MEC he awnanopa didiahpa châ vei, denomination tlôhpa miakha a vaw châ hi tahpa ta ama vaw reih thai kaw. Kaohropa ta eima reih khiah, awnanopa thâtih cha awnanopa liata Khazohpa aphualuahna thâtih tlao a châ. Chavâta eima awnanopa thâtih a pahno leipa chata MEC awnanopa liata Khazohpa a phualuahna a phihtuhpa dei a cha hri aw.

Eima awnanopa thâtih tahpa cha  MEC awnanopa a vaw dua laihna thâtih a châ. Eima missionary hmiatuapazy Rev. R. A. Lorrain, Maud Louise Ulander, Rev. Albert Bruce Lorrain Foxall, Tlôsai Lorrain Foxall, nata Violet Louise Anne Lorrain Foxall nata ama chakaona zy pahno ha awpa a byuh. Eima missionary nawh baotuh awpa ta avy hrapa missionary Miss Gladys Ramsay, Mr. Yule Mark, Miss Irene E. Hadley & Gladys E. Gorst zy thâtihzy achu awpa a byuh hra. Awnanopa a vaw dua laihna thâtih, nata kô 110 chhôh awnanopa chakaona liata kô peimawhpazy nata hmo peimawhpa chhichâna zy pahno awpa a peimawh. He hawhta hmo eima vaw chu phahlapa vâta a daihti leipa pi liata Mission eima vaw chakao tuana noh ECM nata eima lyu leina eima vaw pahno. Chavâta eima thâtih cha keimo thâtih châ vei, Khazohpa ta a phualuahna thâtih tlao a châ.

Awnanopa ngaipâna nata taozie pahnona hnei awpa a byuh. Khizaw liata awnanopa zydua amo nata amo awnanopa ngiapâna nata taozie ama hnei khai. Hmo ânapa khazie ma eima hnei. Batina he kheita a ngiapâ pita, cha cha kheita eima tao. Zisu zapati kheita angiapâ pita kheita eima tao. Zisu thlachha pachupa he kheita a ngiapâ pita khapazy liata eima hmâ tyh. MEC pachuna (doctrine) zy chhao pahno awpa abyuh ta, chakaona bu yzie nata hmâzie chhao pahno awpa abyuh. Chavâta pastaw pakha ta a chakao haipa awnanopa thâtih nata a raihria, a ngiapâna nata taozie zy a pahno thlâhah khiah a mietakupazy pasana liata phahla beih aw vei. Achhâpa cha kô 110 atloh hawpa awnanopa cha ahneirôhna ta ano mohôhna châta a daih lilaw haw.

6. MAOPHAONA A PAHNONA: Tlalana Tawhta Abohna

 Pastaw chakaona raihria cha tovyuh nata taovyuh a pahnona a châ. Zisu Krista pachuna liata “sawchapawpa pano pakhona” reih ta cha cha athaipazy ta “maophaona kyh a châ” ama tah (Mt. 21:28-32). Sawchapaw hmiatuapa cha paw ta ahnawpa cha tao aw vana tah ta, anodeikua paw ta ahnawpa hawhta tao haw ta. Sawchapaw hropa deikua cha paw ta ahnawpa cha ei tao aw tah ta tao tloh leipa ta. Cha pano hry ta ahnawpa maophaona a pahnopa cha ahmiatuapa kha a châ. Pastaw thokha pita pastaw maophaona liata pakô leipa pita, tovyuh hmô awpa kyh liata thapi eima phia kaw tyh. Tovyuh a ypa hawhta maohphaona alai kaw tahpa pahno awpa a byuh. Pkn ta General Secretary ta a tlypa eima cha khiah, GS tovyuh deita châta atlypa châ leipa pita GS maophaona châta chhaota atlypa eima châ. Khazohpa ta eima tovyuh nata eima maophaona liata eima châ chyu ta byhnâ a daihpa ta maniah a so thlaha aw. Mohropa tovyuh uahvâ awpa hlâta eima topa tovyuh liata maophaona la awpa a châ hri. Zisu ta talent pakhona bie a reih (Mt. 25:14-30). Talent miapangawh pavaosapa, talent miano pavaosapa, nata talent miakha pavaosapa tahpa ta ama pavaosapa talent cha papôhsa awpa ahnaw chyupa ama châ. Cha liata maohphaona cha talent papôhsa awpa a châ. Talent miapangawh chôta maohphaona ahneipa cha ta, ahropa talent miapangawh a papôhsa. Chavâta ano ngâchhihpa ta a pypa a châ. Cha hawhta talent miano pavaosapa chhao talent hropa miano a papôhsa hra. Ano chhao cha ngâchhihpa ta apypa a châ hra, Talent miakha pavaosapa deikua cha maophaona ahneipa chôta ngâ â chhih leipa vâta pavaosapa tovyuh chhupa châ ta atovyuh chhao cha maohphaona ahneipa chôta ngâ âchhihpa hnôhta baichhapa a châ haw.

MEC awnanopa lia chhaota pastaw pakha nata pakha chakaona su nata tovyuh alyu vei. Tovyuh cha GS ta tlyma, AGS ta tlyma, ES ta tlyma, nata department luhpa BTE Director ta tlyma, LTC Principal ta tlyma, EM Director ta tlyma, KNP, KTP, KHP Secy. ta zy tlyma, khihtlâh awnanopa miathôh a vaopa ta tlyma, miano a vaopa ta tlyma, khipi awnanopa avaopa ta tlyma tovyuh nanopa ta pavaosapa eima châ. Eima tovyuh cha, thei thai chaina ta, hlao a châ aw. Eima tovyuh liata maohphaona cha raihria a châ. Maophaona vâta tovyuh eima topa a châ hri. Awnanopa opi a phapa ta a sie thei lyma sala, eima tlala leina awpa ta eima maophaona chôta ngâchhihna eima hnei chyu awpa a peimawh.

7. KYHPACHÂNA: Chakaona Liahmaripa

Pastaw chakaona raihria he Khazohpa kyh a pachâna palâsana a châ. Khazohpa kyh a pachâpa vâta pastaw rai a chakao awpa a châ. Chavâta pastaw raihria cha kyhpachâna raihria a châ. Pity cha Zisu zituhpa pakha châ ta, zituhpa hry ta â lâluah viapa a châ. A zibeipa Zisu cha thi ha ta, chavâta Pity deikua hnabeidypa kaw ngyu eita ano py a palyna châta a tao tyhpa nga patuna raihria lâta a kua haw heih. Pity cha nga patuna tawhta cha zituh awpa awpa a châ (Lk. 5:7). Zisu zituhpa duahmo tawhta nga patuna lâta a kua heih. Chavâta ta Pity hnôhta a luah heih ta, “he zydua hlâta kyh na pachâ via chi ma?” tahpa bie hiahrina a tao (Zh. 21:15). Cha tawhta Pity ta Zisu Krista hnôhta, “Abeipa y, na kyh ei pachâpa na pahno na” tah ta, Zisu ta Pity hnôhta “Ei mietaku tawzy pasa teh” a tahpa kha a châ. Achô liata palâsa chiehpa hawhta Khazohpa awna cha thei haw pita, awnanopa liata liahsa bietaihna eima la haw. Reipasaona hluhpi a tyh hra sila Pity ta ngapatuna lâta a sie pakhuapa hawhta pastaw chakaona a bâhsai theipa châ khao mapi. Pastaw chakaona cha nga hluhpi patu ta byhnâ hluhpi to awpa ta chakaona châ leipa ta, Khazohpa kyhpachâna ta chakaona a châ vâta kyhpachâna raihria a châ.

Kyhpachâna raihria cha “mo hropa ta na chai cha saih aw eita, na khoh leipa lâta a daophina” hro a châ (Zh. 21:18). Kyhpachâna raihria cha Khazohpa kyhpachâna a pahnotuhpazy ta ama vaihzy hnôhta cha kyhpachâna ama palâsana a châ, cha chhao cha biepie rônahpa chhao a châ hra (Mt. 22:37-39). Pawla ta Khazohpa kyhpachâna cha, “Khazohpa ta a kyhpachâna cha a reithai tlâhpa ta paluasa ta, moleipazy eima châ nota Krista eima vyuhpa ta a thipa vâna khata” (Rm. 5:8). Pawla ta cha, a chakaona raihriazy cha bie na hneituhpa a châ a tah hra (2 Kaw. 5:15-16). He kypachâna tawhta khapa hma na pachhaih thei vei a tah (Rm. 8:31-39). Cha kyhpachâna cha Pawla ta he hawhta a chhopasia:

Kyhpachâna ta daoh thei ta, a nô pha hra ta, kyhpachâna ta hiatlia leipata, kyhpachâna ta ano sasyh ta a reithai leipata, a palai leipata, â ngia leipata y leipata, ano phana dei pachâ leipata, pathi-iapata y kholeipata, moleina lâ pachâ leipata, sia leina liata aly thei leipata, bie hmeiseihpa deikua cha aly khei tyh ta, ato pasa tao lyh-lia ta, ato a ngiapâ ta, ato hnabeiseih ta ato pasâ a tao patlô tyh (1 Kaw. 13:4-7).

 Atahma khizaw ta a pasâhsa chaipa chhao he kyhpachâna raihria a châ. Mother Tereasa chhao ta areipa cha “Raihria theina he eima raihria theinazie (amount) liata thliepa châ leipa ta rai eima hriana liata kha tlu ta ma kyhpachâna eima pahlao thei tahpa liata eima thlie awpa a cha” a tah. Chavâta pastaw ngâchhihpa ama tahpa cha ta a raihria chakaona to liata kyhpachâna a palâsa lyma tyh aw. Kyhpachâna ahlao leipa pastaw raihria cha hrao leipa tlao a châ. Eima thatlôna nata eima thaina zy he kyhpachâna pahlao leipa ta cha khâpa hma châ hra aw vei.

8. PATHAINA HRO: Abeipa Hmâtlâhpa Châna

Pity ta reih ta, “Cha awtuhpa ei cha a pathaihpa hawhta namo chhao nama yzie zydua lia a pathaihpa ta tlao y teh u. Namo nama pathaih awpa a châ, kei pathaih tlôh na ta” (1 Pt. 1:15-16). Chavâta pastaw cha yzie zydua liata pathaina hro hnei awpa ta hnabeiseihpa a châ. A pathaihpa hmozy chyhsapa chhao ta a hmâ khoh kaw hrapa hawhta, hro pathaihpa ahneipa cha Abeipa ta ahmâ khoh kaw hra. Timothy hnôhta châ rohtuhpa ta a reipa cha, “O rônahpa liana heta hmobaoh tâka nata ngôh ta taopa dei y leipa ta, tho nata beihlei ta taopa chhao y tyh ta, thokha pasô awpa y ta, thokha pasô lei awpa a y hra, chavâta chyhsa ta pasô lei awpa hmozy tawhtapa ano sasyh ta a pathai khiahtala, hmobaoh pathaihpa Abeipa hmâtlâhpa raihria phapa to liata amâ chiehpa pasô awpa a châ aw” a tah (2Tim. 2:20-21). Abeipa hmâtlâhpa châ thei nawpa ta tâka ta taopa liata tlyma, ngô ta taopa liata tlyma, tho ta taopa liata tlyma, nata beihlei ta taopa liata tlyma a pahnieh vei. Khei hawhta hmo ta taopa a châpa chhao a pathaih khiahla Abeipa hmâtlâh a châ thlahana tahpa pahno theipa a châ.

Abeipa hmâtlâh châ thei nawpa ta pastaw cha achuna thaina liata a pahnieh leipa awta, achhaohrâhna liata chhao a pahnieh hra aw vei. Hro pathaihpa ahneipazy he Abeipa hmâtlâhpa tlao ama châ via hri aw. Chavâta hro pathaihpa he kao hluhpi tawhta hmô theipa a châ. Lyuchâ Pawla ta cha pathaih leina he sapa ryhpa miakha hawhta a reih (Kal. 5:19). Cha cha Thlahpa Pathaihpa khohna a dyutuhpa ta a reih hra. Chavâta hropathaih leipazy cha: apatlahnazy, pathaih leinazy, parânazy, nohthlahpa achhynazy, dyuthainazy, ahaonazy, ahryunazy, hiatlianazy, pathiianazy akhonazy, apananonazy, ngiapâna apananonazy, sahmaparinazy, atlaokalihnazy a châ. Chazy cha eima dyuh thei nawpa ta Thlapa Pathaihpa pavaosapa eima châ. Cha hmo zydua tawhta a pathaisa thei nawpa ta eima pathipalôh hmotao theina thlahpa pavaosapa eima châ. Cha thlahpa cha ta hmo pathaihleipazy cha adyuh tyh ta thlahpa theilâzy a vaw pathei tyh.

Awnanopa chhaota Abeipa hmâtlâh eima châ thei nawpa ta Code of conduct atakô Assembly ta apy hawpa kha eima hnei. Code of Conduct ta achhuahna cha, “Pastawzy kyh to liata amopâtlâh ama châ thei nawpa nata Krista vâta daihti to liata chakaotuhpa ngâchhihpa nata phapa ama châ thei nawpa ta” tahpa ta achhuahna ahnei. Bô 7 hnei ta bô hluh via ta anuapa cha pathaihna hro a châ. Awnanopa nohâh yna nata Khazohpa moh rônah via nawpa ta hro pathaihna hro he pastaw pakha châta peimawh kawpa a châ.

9. ACHHUAHNA: Chakaona Châta Lâpi Nothlahpa

Achhuahna tahpa cha raihria awpa châta nohthlapa sa chhielien a châ. Chavâta pastaw pakha chakaona liata pachâpachih chhieliena a peimawhzie he Biehrai ta he hawhta a reih, “Ahyrai ta ano chyhsazy châta pachâ chhielie leipa ta, amo ochhôh liata chyhsazy châta hmahta a pachâ chhielie leipa khiahtala ngiapâna cha a paphasai ta ngiapâ leipa hlâta tlao a molei via (1 Tim. 5:8). Biso rohtuhpa chhaota, “Biehneipa a y leipa khiahtala vâtlâhzy a pathlithlaw tyh ei ta” (Bis. 29:18). Mongyuh biehrai thokha liata, “Where there is no vision, people shall parish” a tah. Aluahna chhieliena a y leina liata chyhsa ama rao tyh tahna a châ. Chavâta pastaw pakha chakaona raihria liata saichhieliena lâpi nohtlahpa hnei awpa byuh ngâsâ.

Chakaona châta lâpi nohthlahpa heta daihti achhuh chhielie awpa a pachâ. Biehrai chhaota reih ta, “Eima hro chhôh nohzy reizi awpa maniah pachu ma y” (Hla. 90:12). Noh nata daihtizy he Khazohpa tawhta eima hmôpa lymâ a châ. Râh hmasiepazy ta daihti he tâka ama tah. Keimo deikua cha daihti he hrona eima tah aw. Kô khazie ma khizaw liata eima hro aw tahpa a pahno mapi. Hnatla ta eima y khiah MEC pastaw pakha ta a sapa kô 65 taih pastaw chakaona tovyuh ahnei. He daihti chyupa eima hnei chhôh ta Khazohpa châta hrona mâ hnei viapa ta ahmâ thei nawpa ta lâpi nothlâhpa hnei awpa a byuh. Chavâta noh chareih raihria nohtlâhpa hneipa a byuhpa hawhta, thla chareih raihria thie chhieliena hnei awpa a byuh hra. Cha kyh vâta Assembly chhao ta Komitina noh thlie chhielienazy ahnei tyhpa kha achâ. O phapa sa awpa a châ khiah Mongyuh reih ta “Blue Print” ama tahpa o nohthlahpa arih-akhawh châta peimawhpa zydua ropady chhieliena ahlaopa tao awpa a byuh. Cha hawhta arih nata akhawh la awpa abyuh ta, cha ropadypa hawhta o asa thaipazy ta ama sa lyma awpa a châ. Cha hawhta Pastaw pakha cha a raihriana ropadyna nothlahpa ahnei awpa a châ. Cha vei khiah a hrona cha a pathlithlaw thlaha aw.

He achhuahna ahneipa heta pastaw cha bie a hnei awpa a châ. Cha achhuahna hlaotloh thei nawpa ta a tha nata zah, a daihti nata châh, a sôh nata piah, thaina nata sona zy cha a hmâ awpa a châ. Cha tita thlachha awpazy hnei awta, cha tawhta Khazohpa ta cha pastaw cha achhuahna hlao atloh thei nawpa ta abyuhpa byhnâ toti a vaw pavaosa pâ hra aw. Cha tawhta hmo hriapazihna liata a vaw tie pâpa reipasaona chhao a vaw pahnie thei hra aw.

10. KUZÔPHAPA: Byhnâ Atlôkheipa Chakaona

Chyhsa ta tiama kaw tyh pita, anodeikua byhnâ to pha hlei mapi. Hrosohpa Hakai ta areipa hawhta, eima hlaopazy cha “a hluhpi tu ei chita, achyh ta hria tloh ei chita, nie ie chita, lôhratlôpata y tlôh ei chi va, doh ei chi ta cha khi tlôh ei va, ahlaopa chata sharia pyupa liata khô awpata ahlao” (Hk. 1:6). Chavâta pastaw châ tlôh pita byhnâ atopa chyhsa kheita eima châ thei aw?

Khazohpa byhnâ awna dâh (principle) achu awpa a peimawh haw tyh. Byhnâ awpa principle he Athaona châbu (1:1-2:3) liata hmôpa a cha. Khazohpa ta hmo tao ta, cha khai tawhta mopazihna a hnei. Chavâta hmo eima taopa zydua he mopazih awpa a byuh. Khazohpa ta “Khaihna vaw y se” tah ta; Khaihna vaw y ta, cha tawhta cha Khazohpa ta Khaihna cha MOH    ta … (1:3). Khazohpa ta lyurâhpa cha Alei bie ta, ti a pahmaohpazy cha Tilaipi bie ta, chatawhcha Khazohpa ta cha cha MOH ta … (1:10). Khazohpa ta thokô râh kôzy cha tao, cha cha MOH ta … (1:12). Khazohpa ta no nata awsizy ataopa MOH ta … (1:19). Khazohpa ta lyurâhpa sa amo chi yzie chyu ta…………………….. tao ta; Khazohpa ta cha  MOH ta (1:25). Khazohpa ta a hmotao to cha MOH ta (1:31). Khazohpa ta hmo a tao khai nata MOH ta double check atao lyma. Keima atahma ta ei paper ropa he ei mopasia vei khiah chyhsa eima châpa vâta eima tao chheipazy a y thei aw. A molei thaipa eima cha vâta sawhkhâ chhaota châparaona (correction) ataopa kha a châ.  Chavâta nama nata kei chakaona he Khazohpa ta amopasia cheingei awpa a châ tahpa pahno awpa a châ.

Khazohpa ta a hmotaopazy cha MOH ta, hmotaopa pha nata pha leipa remark atao tyh. Chavâta Khazohpa ta hmo ataopa cha moh ta A PHA KAW a tah tyh. Khaihna cha moh ta, A PHA KAW a tah (1:3). Alei nata tilaipi ataopa cha moh ta, A PHA KAW a tah (1:10). Khazohpa ta sahro chi nanopazy cha moh ta, A PHA KAW a tah (1:25). Chavâta eima chakaona nata eima hmotaopazy cha Khazohpa ta vaw MOH sala, A PHA KAW a tah thei aw ma? tahpa pachâ tyh awpa a byuh. Chatawh ta Khazohpa ta hmo ataopazy cha MOH ta A PHA KAW tahpa dei châ vei. A PHA KAW a tah khai nata BYHNÂ a awpa tyh. Khazohpa ta hmohro hneipazy cha MOH ta A PHA KAWpa ta pahno ta BYHNÂ awpa ta (1:22). Khazohpa ta chanô nata chapaw tao ta cha cha BYHNÂ awpa ta (1:28). Khazohpa ta noh 6 chhôh hmo tao ta, noh 7-na noh liata pathaisa ta, cha tawhta hmo ataopazy cha BYHNÂ a pie ei (1:3).

Chavâta Khazohpa ta hmo eima taopa hlaotloh byhnâ tona awpa ta he hawhta mohpazih tua awta, cha tawhta pha nata pha leipa mohpazih ta, a pha tlaina a tah khiah byhnâ a awpa aw. Chavâta Khazohpa mo hmô ta, rai eima hriapazy he Khazohpa ta khokheina maniah a pie tlai aw ma? tahpa pachâ tua lyma awpa a byuh. Keimo hmah ta eima chakaona eima palôh a tloh lei khiah, Khazohpa chhochhi khokheina miah pie thei thlyu aw vei. Chavâta raihria eima chakaopazy cha Khazohpa hmiakô liata vawkhei ta Khazohpa palôhtlâh sala byhnâ a piena taih zôphapa ta chakao awpa a peimawh.

BIEKIAHMINA

Achô liata palâsapa pastaw pakha ta ahnei awpa khokheinazy he aki haw tah mapi. He hlâ chhao apeimawh viapa pakipachai leipa a y thei hra aw. Abyuh chypazy baichha ta awpa a châ. Atakô October 28 liana kha ta Yangon MEC liata Awananopa luhpazy achuna eima hnei. Cha liata pastaw phapa tahpa ta ama reipazy cha:

1. Assembly bie nata Assembly ta ahma haipa constitution a pha kawpa ta aduakheipa
2. Palôh pasina ahneipa

2. Awnanopa sahlao vaina a pasiepakaopa/ atiamapa
3. Assembly bie he Khazohpa awna hawhta a pachâpa
4. Assembly bie a complaint leipa
5. Mietaku pha kawpa ta a vaihpa
6. Awnanopa palysa ta thla a palôhtuhpa a cha aw
7. Zachhihna, pathaihna, sianazy ahneipa
8. Pathluana hnei leipa ta kyhpachâna ahneipa

He hawhta keimo ta pastaw ngâchhihpa nothlapa si chyu awpa ta ei cha pahrua ei. Keima pahruana liata aduapa ta atahma eima sie haipa chhâ nata ahmiepa pastor cha arylâ hawhta a châ aw.

1. Khazopha awna sia kawpa pahno ta, awnanopa ta chahnaona/pa-ina a palaikhei kawpa
2. A mietakuzy pasana awpa ta Khazohpa bie a hneirôhpa
3. Khizaw liata hmo atlôh haipa he Khazohpa bie akina a châ tahpa pahnona chôta thâtih bu zy achu lyma tuhpa
4. Awnanopa âboh thei nawpa ta Biehrai tlu ta a peimawhsapa awnanopa dâhryhpa za ta achhihtuhpa
5. Kô 110 atloh hawpa awnanopa thâtih hneirôhna heta pastaw chakaona châta resource ta adaih tahpa pahnopa ta ano awnanopa thâtih a pahnopa
6. Awnanopa a sie pha lyma thei nawpa ta maohphaona a papeisapa
7. Zisu Krista biepie rônah chaipa nata chakaona liahmaripa a chapa kyhpachâna hneina chôta a chakaotuhpa
8. Abeipa hmatlâh achâ thei nawpa ta pathaihna hro a chadaituhpa
9. Awnanopa châta achhuahna phakawpa hnei ta, cha achhuahna hlaotloh thei nawpa ta lâpi nohthlapa tao ta achhituhpa
10. A pasa ngapa mietakuzy châta nata ano châta chhao ta byhnâ tona taihta kuzôpha kawpa ta chakaona rai ahriapa

Rev. Dr. Zodau MEC Tennessee liata leadership training a pie nganopa