SIANA BEIPA (ISAI 11:1-5)
Rev. Dr. L. B. Siama (General Secretary)

Biehmiapa

Khazohpa ngiachhiena nata chhihthana phapa vâta 2017 Krisma cha eima vaw tlô thei haw. Râh to su to liata Bei Zisu Pina Alytuhpa (Krisma patlôtuhpa) zydua lâta Beichaipa Moh ta alyna bie ei cha hlâ ei. Pathipalôh hmeihseihpa ta nama ngiapâpa Khazohpa chata nama chhôhkha chyu ta, sapa nata thlahpa byhna cha pie chyu mawh ei sy!

2017 Krisma biepipa cha “Siana Beipa” (Isai 11:1-5) a châ.  He biepipa hmâpa ta Khazohpa bie nama phuah tita, baotuhpa a châ awpa beiseihpa ta Biepipa tawhta Khazohpa bie ei vaw phuah hra. Nama ryhpaohna hawhta hmâpa ta nama vaw reih chyu awpa ta Abeipa moh ta ei cha hrua ei.

1.      ZISU KRISTA CHA EIMA SIANA A CHÂ.

“Ano cha a chyhsazy ama moleinazy tawhta  pachha awpa vâta a moh cha ZISU ama bie aw” (Matt. 1:21). Pawla ta, “ahyhma a siapa y vei vei, pakhahmâh y vei ei, … chyhsa to molei khai haw ei ta, Khazohpa rônahna to thei khao vei ei,” (Rawma 3:10, 23), a tah. “Moleina hnei vana eima tah khiahtala, keimo sasyh ta eima dô, biehmeihseihpa keimo liata y vei” (I Zhn 1:8). Biechhotuhpa ta, “hmo a parao beihleipa chyhsa cha alei chô liana heta y tlai vei ei (Bich. 7:20),” a tah hra.

Chyhsa cha moleipa a châpa vâta a pathipalôh tawhta pachâna âdo leipazy a pua tyh. Chyhsa chhôh lâ tawhta vaw puapa chata chyhsa a papua tyh – chazy cha pachâna moleinazy, apatlana zy, paruna zy, lianycheina zy, apheina zy, uavâna zy, moleina zy, dôna zy, parâna zy, kiaphaona zy, reipachhiena zy, apalaina zy, hruna zy hih! (Maka 7:20-21). Pawla ta cha hawhpa chyhsa cha sapa chyhsa tahpa ta bi ta, he hmozy ama tao tyh – apatlana zy, pathaih leina zy, parâna zy, nohthlahpa achhyna zy, dyuthaina zy, ahaona zy, ahryuna zy, hiatliana zy, pathi-iana zy, âkhona zy, âpananona zy, ngiapâna âpananona zy, hiatliana zy, sahma parina zy, atlaokalina zy hawhpa hih (Kal 5:19-22) – cha hawhpazy cha Khazohpa khinarâh to a vei ei, a tah. A yzie cha Khazohpa sawzy bitlâh châ vei ei, tahna a châ. Zeremiah Châbu ta, “pathipalôh he hmo zydua hlâta dô thai nata pasichhih ngaitapa a châ, Abeipa cha palôhru a mohtuhpa, pathipalôh a pasiatuhpa a châ” (Zer. 17:9-10), a tah.

Krisma cha chyhsa sia leipazy cha chyhsa siapa ama châ thei nawpa;

      Khazohpa rônahna a to thei thao leipazy Abeipa rônahna ama to heih thei nawpa;

      Moleina cha Biehmeihseih a hneipa nata chyhsa siapa ama vaw châ thei nawpa;

      Moleina a papuaparie tyhpa Pathipalôh tawhta Siana theilâ a vaw pua thei nawpa;

      Sawzy ta bitlâh a châ khao leipazy Khazohpa sawzy ta bipa ama châ thei nawpa;

      Moleipa ama tah tyhpazy cha Chyhsa siapa ama tah thei nawpa ta ZISU cha CHYHSA ta vaw       pih ta khizaw lâta a zupa a châ.

Chavâta ZISU CHA MOLEIPAZY SIANA BEIPA a châ. Hla a taotuhpa ta,

      Beipa kyh miah pachâna zie, lyna hla ta sa tua su’ vy,

      Ngiachhie tlâh lei keimo zy tlai, chhazaw hrona miah pie haw’

                  Hy lyna hla ta sa tua suh vy, Beipa kyh miah pachâna zie;

                  Haleluia chhazaw Beipa, ngiachhie Beipa reithai si!

      Ei chyhsa châ beihleipa cha, ei chyhsa ei tah aw, a tah.

      A ngiachhiena  bie cha vaw tlô haw, Lyna hla paryh su vy.

2.      ZISU CHA NGIAHTHAINA BEIPA A CHA

Zisu thisaih siana vâta ngiapâtuhpa (Awnanopa) cha a moleina zydua tawhta a ngiahthaipa a châ. Moleina hnei taraw ta ama ngiahthaipa a châ. Cha angiathaipa chyhsa cha ngiapâna vâta “CHYHSA SIAPA”ta raopa a châ.  Abaraha cha Khazohpa a ngiapâ ta, cha ângiapâna cha a siana ta raopa a châ (Kal 3:6). Chavâta molei ngiahthaipa chyhsa cha Zisu Krista zawzi ta “Mopathaihpa” tahpa a châ haw (I Kaw. 1:2; Eph. 1:1; Philp. 1;1; Kaol. 1:2).

Khazohpa ta Zisu Krista hmâpa ta ano ngiapâtuhpa zydua cha ngiathaina kipa a piepa vâta “Khazohpa ta âmo cha molei ngiathaipa, moleina hnei leipa hawhta  nata chyhsa siapa nata mopathaihpa hawhta a rao haw,” (God declared that they are righteous, and then saints). A rao ta raopa eima châ. Lô-o â tâh taraw ta, Dâh ta a papua hawpazy cha Lô-o âtâh bâ leipa nata chyhsa siapa hawhta ângiahpa ama châpa hawhta keimo chhao Zisu Krista vâta chyhsa siapa, mo pathaihpa hawhta ângiahpa eima châ haw.

3.      BEI ZISU CHA EIMA MOPÂPA SIANA BEIPA A CHÂ

Zisu cha hrohsopazy ta kô hluhpi tawhta ama vaw reichhiliepa â vy awpa Mesia a châna palasa awpa ta Isai 11:1na liata ano (Zisu) cha Zese thabypa tawhta achhyh a vaw puapa, Zese pathlapa liata  thari a thlapa, cha achiahzy tawhta athei vaw pathei awpa cha a châ, a tah.

Zese thaby tawhta a vaw pih awpa Hawsaih (Zisu) liana cha ta, thlahpa miah 7 âchoh aw. A yzie cha thlahpa nanopa châ leipa ta Khazohpa Thlahpa miakha tawhta tlai ta, he hawhta  hmotaotheina nata châna thlahpa a hnei aw, tahna tlao a châ.

1.      ABeipa Thlahpa

2.      Sona thlahpa

3.      Novahna thlahpa

4.      Ryhraona thlahpa

5.      Thatlôna thlahpa

6.      Pahnona thlahpa

7.      ABeipa china thlahpa

He he Zami 3:20 ta, “Chôlâ tahta sona a za puapa deikua cha hmiatua ta pathaih ta, adyhna khoh ta, a nônai ta, chhoru leipa ta, ngiachhiena nata thei phapa ta bie ta, thlei hlei hnei leipa ta, piepie vei. Siana thei cha adyhna a taotuhpazy châta adyhna ta tupa a châ, a tahpa kha a châ.

Zisu Siana Beipa a châna awpa liata atlohna cha he hawhta hmô theipa a châ.

a.      Âlyna cha Abeipa china liata a châ (Isai 11:3) – Chyhsa hluhpi cha Abeipa palysa awpa hlâta chyhsazy khokheina eima to thei nawpa ta âmo palysa awpa eima chhuah tyh. Zisu deikua cha Abeipa Khazohpa china tlao a tlua tua.

b.      Ano cha mo ta a hmôpa nata nah ta a theipa hawhta pachia aw vei (11;3b,c)-  Biehrai parohpa yzie ta cha ‘pachiana sakha kha tao tita, achyhchai ta pahnokheituhpa mo 2 tlyma, pathôh tlyma a y awpa a châ, a tah (Rc. 19:15-16). A yzie cha âdopa ta ta pachia awpa tahna a châ. Chahrasala thokha kyh liata pahnokheituhpa pakheipa taopa a châ tyh. Thokha kyh liata cha ‘mo ta hmô taraw pi ta, hmo yzie pahno hlei mah pi, thokha kyh liata cha eima nah ta hnei taraw pi ta, eima theipa cha âdo/do leipa pahnopasia mah pi.” Chavata Ano Zisu cha pachiana dopa ta a pachia awpa.

c.       Ano cha chyhsa pathluapa ta pachia vei (11:4) –

Ano cha ahy hmia moh leipa ta a pachia aw.

            Ahneirôpa a haopa ta sipasapazy khokhei via hlei vei.

            Ahneirôhpazy khokhei viapa ta sipasapazy mohnao hlei hra vei.

            Âbyuhna hawhta pachiana dopa siekheipa ta chyhsa tlao a ra tyh.

Mari reithaina hla (Luka 1:46-55) liata

            Mari hawhta hiahkhâpa chanô cha nohlao tahpa moh tlao a bi.

            Khazohpa cha ano a chituhpazy cha a ngiachhie tyh ei.

            Apalaipazy cha panawhsa ta, ama ryureina dyuchhai tawhta  a daophi pathla tyh.

            Khazohpa chi ta a panawhpazy cha su sâhpazy liata a patyusa tyh.

            Ado leipa ta rihbipazy cha nodipa ta pa-ysa tyh ta,

            Chyhsa do leipa vâta nodipa ta ama pa-ysapazy cha rih biepa ta a pasiesa tyh ei.

            He heta thlei hnei leipa ta a pachia tahna a châ. Dyhchhiepa khokhei ta hneirôhpazy             âhaona kyh châ vei.

d.      Siana nata ngachhihna cha pachiana liata ahmâ chaipa chaisaihna a châ aw (11:5) – Hrohsopa Isai, Amôsa zy daihti liata ryureituhpazy ta SIANA NATA NGACHHIHNA hmâpa ta pachia thei khao vei ei.

            Âdo leipa ta ryu ama reih. Pahnotuh pakheipa ama tao.

            Ahy  khokhei viapa hneipa ta ryu ama reih.

            Hmo piepa (bribery) lâpa ta ryu ama reih.

            Athôhbiehna pachâna chô ta, ryu ama reih.

            Hmo a pie thei viapazy thai ama pachâsa.

Rc. 16:19-20 liata “Hmo piepa (bribery) chata chyhsa sopazy (ryureituhpazy) mo pachao ta, chyhsa siapazy (ryureina dopa) cha khapa hrao leipa ta ama pachâsa tyh,” a tah. Amôsa 5:24 ta, “Adopa ta Ryureina cha tizy hawhta  loh sala, siana cha vâhpi hawhta a loh mawh sy,” a tah hra.

4.      SIANA BEIPA RYUREINA CHA ADYHNA NATA ARYHNA A CHA (11:6-9)

            Khazohpa chônôchaipa hnoh ta rônahna y mawh sy,

            Alei chô liata ano a palysatuhpa chyhsazy hnoh ta adyhna y mawh sy (Luka 2:14)

Zisu cha Siana Beipa a châpa vâta, ano ta ryu a reina maih liata cha adyhna, aryhna, thlahlôhna a y tyh. Cha cha Byhna eima tahpa a châ.

a.      Siana Beipa ryureina liata cha khâkhaipa y khao vei ei (11:6), Unawh pilahpa hawhta tlao ama y ha aw. Chyhsa pachâ ta a y khoh thai lei awpazy cha:

      Changie nata mietaku tawh,

      Keihchhoh nata mietaw,

      Chakeibarôhhneipa nata viachao taw,

      Cha hawhpa khâkhaipa ama tahpazy cha hmaohkha ta akaona pati ama nie khoh             aw. Khakhai y khao vei, Unawh sietanô hawhta ama y ba aw.

b.      Siana Beipa ryureina liata cha ahyhma a pasasa (hurt) khao aw vei ei (11:7-9) –

Bei Zisu ta, “sei cha tah khao aw vei ei na, … viasa tlao ei cha tah aw ei (Zhn 15:15), a tah. Viasa chakhyhpa châ vei. “Unawh hlâta a-i viapa viasa” tlao a châ (Bieso 18:24).

Duah pachâ hra tuah!

      Chavyh nata viachao ama viasa aw.

      Ama tawhzy (pathlahpazy) hmaohkha ama y khoh aw).

      Chakeibarôhneipa cha viachao hawhta sâhkô abâ aw (Ama niepa âlyu ba aw)

      Chyuphao (Vâzi) parih nata hawtizy ama chi kaw tyhpa su liata ama palao khoh aw.

      Rohinja nata Rakhine chyhsazy hmaohkha ta ama y khoh ba aw (Baichhipa)

Unawh hawhta, Unawh hlâta a-i viapa viasa hawhta ama châ khai ba aw. Khazohpa khihrah sawzy ama ly awpa zie duah pachâ hra tua!

c.       Siana Beipa Ryureina liata apachisana y khao aw vei (11:9) – Chyhsa to ta Zisu Krista ama vaw pahno tita la, adyhna, aryhna, thlahlôhna heta chyhsa hro zydua a chahryh khai ha aw. Cha tita:

      Bie a reihthaipa ta a reih thai leipa  pachisa khao aw vei.

      Thatlôpa chata thazah a hnei thai leipa pachisa khao aw vei.

      Charia chhaichhi a hneipa chata a hnei leipa cha pachisa khao aw vei.

      Ahneirôhpa chata dyhchhie sipasapa pachisa khao aw vei.

      Athaipazy chata a thai leipa pachisa khao hra aw vei.

      Chapaw ta chanô taochhie khao leipa aw ta,

      Sahma paripa chata a pari leipa hnoh ta, “na ngâh ma?” tah khao hra aw vei.

      ….

Tizy heta ti laipipa a biepa hawhta leilô heta Abeipa pahnona, novâhna ta a bie khai ha awpa vâta chyhsa to adyryh kawpa ta hmaohkha ta ama y khoh ba aw. Phopi zydua ta ano MESIA          cha ama vaw pangai ha aw.

Biepachhana

2017 Krisma biepipa heta eima châta Hawsaih vaw pihpa cha

            keimo hawhta moleipazy tlai heta chyhsa siapa ta miah tao ta,

            Ano siana âhlypa ta hrokhei awpa ta tha miah patlô ta,

            Ano Bei Zisu Lyu awpa ta miah a pachu.

Siana Beipa heta he khizaw liata chyhsa zydua eima châna nata tao awpa miah a chho.

            Unawh hawhta adyhryh kawpa ta y thei awpa ta eima hrona taopathi ta,

            Pakha nata pakha a pachisa khao leipa ta tlao a deichhy awpa ta miah a pachu.

            Ryureina maih liata siana nata adona hmâ awpa ta sona miah pie ta,

            Eima taotheina vâta phao pahri leipa ta angiahthaipa eima châna miah patheisa.

            Tovyuh miah a piepa he tao awpa maohphaona miah pahneisa ta,

            Cha zydua cha Bei Zisu thatlôna ta eima tôh lyma aw.