Biehmia

Chin State liata Missionary zy ama vaw tlôna thatih he a pachho theina hawta ei vaw palâsa. Ama vaw tlôna kô nata ama thatih pachhopa ngala palâsapa a châpa vata a ki tiara aw vei. Pahno byuh viapa zy châta hmialâ ama thatih pachâ thai via nawpata ei vaw palâsapa a cha.

Rev. A. E. Carson

Carson he Hakha khi liata 15, March 1899 kô liata American Baptist Mission (ABM) tawhta tuapa ta a vaw tlô. Cha daitih liata Hakha khi he ody 300 râhchhoh a châ ama tah. A chakaona vâta Hakha liata First Convert cha U Siakhaw (1906) a cha. 1907 liata Chin Hills Baptist Association a vaw padua. Chakao lymâ ta 1. April, 1908 liata Hakha khih liata taotuhpa anoh tuatuhpa Khazohpa liata a paha haw. A paha daitih liata cha Hakha khi liata Local Church Sâkha a vaw dua haw tahpa a cha. A pina khihpi nata râh zy siesaipa ta Chin chyhsa nata Chinland liata lu pabu tua chaipa Missionary a cha.

Dr. East

1902 liata Hakha vaw tlô ta Hospital Rakhô (20)pa a tao. 1911 ko liata America lâta a palie haw heih.

Rev. R.A. Lorrain

A. Lorrain he a lapinô nata 26. 9. 1907 noh ta Saikao khih vaw tlô ta, Mara râhchhoh liata thatihpha chhô lymâ ta, tahma ta Mara Evangelical Church (MEC) a vaw paduapa nata Mara châ taotuhpa, Chin State liata Biehrai (1956) a papua tua chaipa Missionary a cha. Mara Biehrai he Myanmar râh liata a puapa Biehrai zy nata ko thliena ta reihpa a cha khiatala sa (7) na liata a puapa a cha. Mission Siku zy padua lymâ ta Ngala khih liata Siku padua ta pachutuhpa pakha soh ta, he kyh nata a zaopa ta Cope nata Pakao liata atyhna a hneipa a cha. R. A Lorrain chhao he 2. 2.1944 kô liata a chakao ngalapa nata Marasawzy hnochhyhpa ta tuatuhpa Khazohpa hnohta a paha haw.

Rev. Dr. J. H. Cope

1908 liata Hakha khih vaw tlô ta 1910 tawhta Hakha tawhta Tidim la a paly ta chakaona he Tidim râh, Chin State liata a hria papua lymâpa a cha. ABM tawhta châ pyly ta Tidim chyhsa zy ta ama Missionary ie-hrapa hawhta ama pachapa a cha. Cope nata Lorrain he Pakao liata a tyhpa ama cha. Ama tyh khai tawhta daitih hlupi a chakao hlâ ta 11, June, 1938 liata a paha haw. A thlah su he Carson pabuna Missionary zy thlah su liata pabupa a cha hra.

Rev. E.W. Francis:

Ano he Paletwa Khumi chyhsa zy lâta 1936 liata thatihpha chhotuhpa Missionary a cha. 1929 kô liata Bible Churchmen’s Missionary Society tawhta Missionary pakha a vaw tlô tahpa ama tah. Anglican Awnanopa tawhta cha eih ta (BCMS) Bible Churchmen’s Missionary Society tawhtapazy ama cha. Francis he 1959 liata Khumi châ ta, Biehrai a papua tahpa ta eima pahno. April, 1965 ko liata Paletwa he puasaipa ta England la a kua hawpa a cha.

Dr. C.U Strait

1925 liata Hakha vaw tlô ta, 1928 liata Chin Hills Bible School a paduapa a cha. 1940 kô liata America lâ akua haw heih. 4.3. 1980 USA liata a paha haw tahpa thatih daopa a cha

F O Nelson

1940 kô liata Tidim khi avaw tlôpa a cha. Biehrai siku a paduapa Missionary ta pahnopa a cha.1951 kô liata America la kua ta, 15/6/1990 liata a paha haw tahpa ta pahnopa a cha.

Marcus Jordan

Ano he Roman Catholic tawhta Mindat khih liata 1948 kô liata a tlôpa Missionary a cha. 26/5/1968 liata Mindat liata a lu pabupa ta a pahapa a cha.

R.G Johnson

Anoh he ABM tawhta ama vaw tuapa Baptist Awnanopa Missionary hnochaipa a cha. 1946 kô liata Tidim vaw tlô tua ta, cha tawhta Hakha lâ he 1947 kô tawhta a vaw paly. Chah siepi a chakao khai tawhta Myanmar Sawkha ryureina vata America la akua heihpa a cha hra,

Bietana

Missionary zy nata Karean chyhsa zy ama kaw tlô hra tahpa pahnopa a cha. Chahlei kho ta Missionary zy nata a hria paraopa, Chin chyhsa zy hlupi ama y hra aw. He rakha he a pachhopa ta ei vaw palasapa chasala aki viapa ta pahno khohpazy achuna khohna apahnei sa khiatala rohtuhpa thlahchhana he Khazohpa ta byhna a pie ei tah. Awnanopa phupy nanopa zy ta ama ti nata tlâh Awnanopa Denomination chyu ta Missionary ama hnei chyu thei aw. Khazohpa ta Missionary zy chakaona he byhna pie via lymâ mawh sy!

____________________

Cha rotuhpa: Rev. Vazilai