Mission Chakaona Report (July-August, 2017)
Rev. Lechau
Mission Director

Ngiapâ lâhpa nôpaw, unaw sitanô zydua sai u,

Beichaipa Krista mohta chibai ei chabu ei. Mara Evangelical Church, Mission chakaona he nama thlah chhana vata ABeipata miah chhihtha phata eima siepha lyma. Hriatuhpazy rairuna hluhpi y hrasala thlahchhana chôta chatô lyma eita chakaona diathla leipata ama chakaopha lyma hra. Miah achhithatuhpa Khazohpa Moh chhazaw ta reithaipata y mawhsy! AMEN. Mission report he eima Office Wifi phaleina vata adaiti liata chapie thei khaoleipa pita nôpaw nata awnanopa zy lâta ngiathaina eima chahaw hmeisei. Atahma he 2017 July nata August thlachhoh Mission chakaona nata field chhôh chhichâna zy he arylâ hawhta eivaw palâsapa a cha.

• Laymyo field

1. Sunday School Primary achuna bu he Evan. Theinlung ta patôpatia ta Senior a chuna bu he Rev. Phwethang ta patôpatia pata ama chu pathao thei haw.
2. Chaingsanu biatuhpa Rev. BuKwe cha Chaingsanu KNP zy chhaota tha thyukawpata 27-30/7/2017 nohta bia ama chahlô.

3. Mawsoekyi biatuhpa Prop. Aimang cha Hyutuhpa nata awnano machâ zy chhaota 2017 August 9-13 taihta bia chahlôpata awnanôpa ama chakao lai.
4. Lekang nata Evan. Kyawhla cha Kyichaung, Lepantaw, KyauPaung, Karrapyin Awnanopa zy ama vai theihra.

5. Field Secretary Rev. Khawthai nata Tathaung hyutuhpa U Lawmon cha 7-14/8/ 2017 noh liata Mala local church tawhta piepa sôhta Lepantaw achhyna o sa eita achô diakhai eita bâtlah zy chahrei khai hawpa acha. 

• Mro field

1. Mro field he Myone (township) sapali lâta apachhai ta Maungdaw nata Butitaung cha buana chhôh liata a ypa ama cha. Hriatuhpazy nata azao thei khao mapi. Mro field buana (Kala nata Sawhkha pheisai adyuna) he ary liata palâsapa acha. Ponan -gyuan Myone nata Kyaukdaw myone liata chakaotuhpa zy report hmôpa acha. Bia chahlôpata ama chakaopha lyma pata pahnopa acha.
2. Hriatuhpazy niedo rairuna amatyh pata pahnopa achahra.

• ASho field

1. Austrailia, Park local church piepa sôh ta Kanlet Quarter châta arikhaoh patôpatiahaipa châta ata kô chhôh liata sa patlôthei awpata thlahchhapa achahra.
2. Zawnaing he palorupa lâchhah tlâ-â leina ahneipa châta atahma cha namo awnanopazy thlahchha kheina vata atlâ pathlaha pata pahnopa acha. Saya Zaw naing he ngiapâna a i kawpa cha ta ABeipa rohnanachhao aphualualyma. A saw chapawpa ko 12 pa, Py 6 std achu haipa thata vaw pasata apuhpa zy nata a unaw hropazyta atlah thein’awpata ahripa lâ atheina hlâ awpa ama chhua. Saya Zawnaing ta kho tiara leipata ahripa lâta atheina hlâ ula atlahpa chhaota kei mata eithie pa- khua aw ahripata apatlah parai khovana tahpata apachisa haw ei. Asanaw zy chata Zawnaing he atah hmeisei awna, Palorupa tlah â leipa chatlôta tah eita a madi khai haw. Rev. Daikau nata thata thlachha lyma eita amy lâta atlâhhaw. Haleluia!

• Hletu field

1. Hriatuhpazy khi tlypata ama chakao pha ngasa. Ngiapâ thiehpa mo 12 hmô eita hawti thiehpa 1 api. Awnanopa mo 13 amapô tahna acha.
2. Ama rah he lâpi sievawna rairu kawpa rah acha vata motor lathlo yna lâzy, tibaly sietheina chava kialâzy apaly lyma eita Awnanopa y na khih thokha zycha arao khai haw. Araohawpa khih zycha, Zuatie khih dyh 13, Aye Mya dyh 10, Kuli dyh 7, Lauzaw dyh 16 acha. Thokhacha awnanopa MEC yna liata apaly eita thokhacha Awnanopa yleina lâ apaipa ama y holo hra.

• Myo khami field

2. Rairuna zy papeisa leipata hriatuhpazy khitly lyma eita ama chakaopha kawpa acha. Ngiapâthiepa mo 10, hawti apithiepa 4 cha eita mo 14 ama pôh.
3. Hriatuhpazy raihria patlapasaona meeting ei 2 taothei eita amatha athyukawpata pahnopa acha.
4. Awnanopa zy ABeipa lâta alyna kyhchhi chyhpachhao amataohluh kaw. Khazopa ngiachhina reithaina kyhchhi, saw byhna alyna kyhchhi, chhokha ahlana kyhchhi nata Othiehpa aBeipa lâ hlâna kyhchhi..zhp taohluh eita pastor hyutuzy amahrua pha ngasa.
5. Dr. Va kô ta apiepa sôh ta Kanbu khih liata Quarter cha arikhao lakhaihapa châta daihti reileipa liata sa pathao theiba awpa acha.

• Maudaw, Butitaung Mission field buana

Rakhine, Maudaw rah nata Butitaung rah liata A ypa mission field (Mro) cha Kala nata sawhkha adyuhna vata thata bua eita rairu rietheina thata ama tyh. Mara awnano pata eima chakaohaipa Mro chipho he Bangaladesh rah liata hluvia pahrâ eita Myamar rahchhoh liata malu he 20000 daima ama cha.Myanmar rah chhoh liata sawhkha avaona Township (Myone) sa 4 , Maung daw, Butitaung, Ponangyuan nata Kyauktaw ta amapachhaih heipa acha. Maung daw rah chhoh pahrâpa he hluhchai eita khih 50 hlei, malu 9000 rachhoh, Karama a chhypa saita amacha. Eima awnano pata Maungdawrah Mro chakaona he 2016 tawhta local church sa 2 Kyaunaphei Awnanopa malu 50 hlei nata Lemro keiti Awnanopa malu 30 hleita padua theipa acha . Butitaung rah lâ tawhta apaly pa eima awnano pazy dyh 10 chhi y eita khinano paliata dyhkha dyhno ta ama y holo hra. Chaleipa Maungdaw rah liata Mro khizyhe cha thatipha eima chakao pathao haipazy ama cha.

Atahma Rakhine rah buanaliata Maungdaw rah he buabâchaipa acha. Khih hluhpicha amakhih lia ytlakhaoleipata amapuakhaihaw. Meikapakhihzy hluta y ngaleinavata puasaipakhihchhao ahluh ngasa.

Khuntaung khih he achôkhih nata arykhih ta y ta khinota odyh 40 hlei amacha.Kala nawta khih meita raoeita amakhih meiphao lâta achakhaihaw.

Khihsaw mo 3 thieita mo 5 hma amaphao. Hmaphaopazyhe rah lâta arâ eita pheisaizyta mohô eita amahmahe hmalaipa achavata September thla 6 nota Butitaung thohna o ama vaw tlôkhei. Pakhapa hawti Kô 3 pacha abâ a chiehaw amatah.Rev. Thartun vaw aw eita ava vai ei. Rah lâ ama râpai nota Kala nawta ama chadaipa achâ vata chysia hnei tlâ vaei. Rev. Thartun lapino (Saihmô nô) ta chysia zy apie ei.

Kaingyi khih he lâta lyuliata mo 8 ama khih acha. Khih sawzy khih liata y ngakhao leipa eita Butitaung (Rev. Thartun y na) lâta avaw râ eita Refugee ta mo 250 ama y. Theintaw khih mo malu 50 hlei chhao he avawrâ hra eita cha liata amapahly hra . Butitaung Refugee camp liata Mro chyhsa 300 ama y.

Maungdaw 3 miles phoki o liata Mro Refugee 300 hlei ama y hrapata thati daopa achahra. Chahleikhota Tupanaka, Taring, Nanrakaing, Tamada khih zy liata Mro chyhsazy dua pahmaopata sawhkha pheisai ta avaih ei tahpa thati pahno chypa acha. Malu dei pahnopasia thei maleipa acha.

Butitaung rahchhoh a ypa Mro nawhe eima awnano khih 23 chhi pha eita awnanopa achâ leipa khih chhao 20 hlei ama y hra. He rahchhoh liata Mro naw chhao he chariah adyuhna su cheingei cha taraw leipata Kala naw y na nata ahniapa vata ahyhma ta pua – angiathaipa châkhaohra vei. Ama khih chheipa rah liapa liata a nyuna leikhaozy aru lâta tao eita chi ngaitapata ama y. Lyu siethaipa châleipata niedo tlua thaipa achalei vata niedo rairuna thata ama tyh. Butitaung rah chhoh lia he eima awnanopa 1400 hlei ama y. Buana chhoh lia heta eima Mission hriatuh pazy a ma y holo. Buana chhoh liata a y pa hriatuhpazycha:

1. Thartun: Mro chysa châta alapino he mara zua Sabyhpi khihpa acha.

Butitaung myone nata Maungdaw myone mro field avaotuh pa acha. Arah chysa zy amapawhrapa haw tlaita abochha eita buana vata Mro chysa zy châta chichhihna hry liata patopatia tuhpa nata buakheituhpa acha.

2. Saya Laihe: Rev. Awkho sawchapawpa, Heimatae pa acha. Saya Laihe he Maungdaw Myone Kharuchaung khih liata saku ko 2 na ta apachuhaipa a cha. Kala nawkhih nata miles 4 rakha ahlanaliata y ta azaotheikhaomaleipa a cha.
3. Neingie: Taubu khihpa chata saw pakha ahneipa acha. Butitaung Inn chaung khih liata ama y. He khih la hecha buana su cheingeita charaw leipata Kala naw y napasu nata Miles 6 rachhoh ahlapa acha. Pua a ngia pasaikhao leipa acha. Rah lâta anyuna o arulâta asakhai eita chingasapata khih liata ama y. A zaokhiena hneitheihra mapi.

6. Sayama Emali: Saw 3 ahneipa chata atakô ta achakao pathaopa acha. Aru khipa châta Butitaung myone Leparkaing khih liata acha kao. Leparkaing khih he Kalakhih nata miles 7 rakha ahlahrapa chata anyunazy asa eita chipata khih liata ama y hra. Phone achho thei hra mapi.
7. Kyahla Aung: Mro chi châta Leparkaing khih liata achakao haipa acha. Saw 2 hneita amachhoh khata Leparkaing khih liata ama y hra.
8. Mghla: Mro pa chata saw 5 ahnei. Butitaung myone Taungsaungyi khih liata achakao. Butitaung tawhta notho lasi la ta achâ vata thatih athei theikhao mapi.
9. Kyapaing: Mro pa chata satliapa acha. Butitaung Myone Palasai khih liata a y pa acha. A zaotheihra mapi.
10. Vabiebyhna: Rev. Thartun sawchapawpa cha ta sawchano pakha ahnei. Maungdaw myone Lemro Keiti khih liata achakao. A bua hlatata apaw y na Butitaung la azu ta Butitaung liata atahmahe ama y. Mro rairu rietheipazy chata a paw nata abuakheihaihra.
11. Hla Mg Thein: Mro chi cha ta Nahang khih liata achakaopa acha. Saw 1 hneita Butitaung myone Bangaladesh rari lâta a y.

Buana chhoh liata a tâh hapa hriatuhpa, Awnanopa nata Mro zy he riethei rairu hmeisei eita bao ama ngia hmeisei. Maudaw (myone )rah chhoh liata a ypa Mro nawcha ama khih puasai khai eita lyu hnei khaoleipa, abu asai nata niedo, bih-phia ahneikhao leipa sai amacha. Athipazy, Hmaphaopazy, O meikâ hapazy nata Khih rah puasaipata khapahma hneikhao leipata ama popa saita a y pa ama cha. Ngiachhie chhih eita bao ama ngia hmeisei. Butitaung (myone) rah chhoh liata Mro nawchhao he Sievawna lâpi akhaw khaipa vata ama rairu khai hra. Eima unawpa zy sapapopa nata palo rupa pasana he thata a châ vata Missionary raihria achakao haipa keimo ngiapatuh pazydua ABeipa lâta akhu sila thlah chhakhei khai su vy! A pie pasai khai su vy! Eima unawpa zy he ABeipata vaw patlah hahei mawsy! Amen.

• MEM New building thiehpa sa n’awpa cha ta Austrailia Mission Board tawhta phusa akipata eima hmô haw. Ks. 40,000,000/(Four hundred lac Kyats only) acha. Eima ly hmeisei. O chhao areihla ta eima sa patlôtheipata hnabei sepia acha. Austrailia MEC he ABeipata byhna pie mawh sy!

Krista liata,

Rev. Lechau
Mission Director
Sittwe.