Mara Biehrai Vawpina Thatih Pachhôpa

Rev. Vazilai Registrar, LTC
30^th Pachaw, 2017     

Biehmiapa

Mara châ he Capt. S.R Tickell (A short vocabulary) ta 1852 ta tao tua chai ta, Capt. Lewin ta 1869 ta Mara châ he a tao chanie heih tahpa record liata hmô theipa a cha. 1908 kô liata Re. F. W. Savidge ta “A Grammar and Dictionary of the Lakher Language” (Total page- 230) Pioneer Press, Allahabad tahwta papuapa chata he châbu he Mizoram State liata a pua tuachaipa châbu ta pahnopa a cha. N. E Parry rohpa The Lakher (1932) liata“ Mr. Lorrain has, I believe, compiled a Lakher Grammar and Dictionary, but has not as yet published it; he has also drawn up am alphabet of his own which he has used in all the books he has published” tahpa ta a roh. (The Lakher P-511) A yzie châ: N. E. Parry ta Lorrain ta Mara châ eihpa taopa châbu apapuana kyh a rei. Chavata Mara châ he vaw tao chyu eih ta tahma ta Marapa ta a hmapa he Rev. R.A Lorrain taopa he a châ.

Mara Biehrai he Mara râh châta Khazohpa ta â awpa Missionary Reginal Arthur Lorrain ta a vaw tao hriapasapa vata a vaw ypa a châna kyh he a tlâhpipa ta ei vaw palasa aw. Rev. R A Lorrain he Marâ râh chipho châta Khazohpa ta vaw tua ta, Mara râh Saikao khih he 26^th Thlarah, 1907 liata a vaw tlôpa a cha. A vaw tlô tawhta Marapa sawzy châta a hriapasapa hlupi hry ta Mara Biehrai nata a zaopa dei he palasa awpa ta ei chhuahpa a cha.

Thâtihpha Zawhana Châbu palie pathaona nata Biehrai Thiehpa Patlôna

Rev. R A Lorrain ta Thlarâh noh 16, 1908 tawhta Thatihpha Zawhana châbu he a vaw palie pathao tua chaipa a châ. He Mara Biehrai Thiehpa paliena liata baotuhpa châ Saro Nôhro, Tisôpi khihpa he â hruapa ta pahnopa a cha. Thatihpha Zawhana châbu (Mara Biehrai) paliena kyh nata a zaopa ta Rev. RA Lorrain anoh pohpa ta “Five years in unknown Jungles” liata he hawhta a roh. “Akhô chiehpa kô (2) chhôh zydua cha raihria thapi ta a hrie pi ta, My dawh pangawhpa liata eima thyupa he zâcho dawh 12 a paro hla via cha eima rakhô ngai theih tyh ma pi. Reih (Language) rairuna he eima chatôkhei chaipa châ ta, Nohchhô lâta reih ei ro pakhypa zydua kha, ei patly pachhuah khai hla lei ta cha, apahâ sai thei rimâpa cha vei. He ta tao vei mawh sih la Dictionary nata Thâtihpha Zawhana châbu cha thlai ta papua theipa châ va.

He daitih liata ei Lahpinô kyhpachâpa cha sathaw mei-oh khaina ryh liata hawtipa viahpakaochô nata siku hawtizy viapakao, thlasipaw daitih liata amâ kyh awpa biehpa ta a tly rai tly theih hra vei. Siku hawtizy ta pathaihna nata siana ama uasa via thei nawpa hnabeiseihpa ta thapiphia ta, Keima ei pahâ hlâ lei cha, khatlu ta zâ reipa hmâh châ hrasala a hria hnolo ngâthlah ha tyh. Khazohpa ta eima ku raihria, eima saduthliena nata eima hriapasana zydua byhnâ pie ta, Mara chyhsa hnohta amô reih cheingei ta rohpa Thâtihpha eima pie awpa nata Thâtihpha vâta Kraws thaby liata eima tlôkheipa eima hmô awpa a pasaihpa dei châ leipa ta, keimo ku tlai ta Thâtihpha sôh ngâsâpa Mara chyhsazy ku liata pie awpa ta miah a pasaipa he a khokheina sâh chaipa miah a patosa tah lei thei ma pi. He Thâtihpha châbu he chyhsa hlupi Ano (Khazohpa) lâ sy nawpa, a vaw palie awh eihta ama hro tô nawpa a châ tahpa eimâ ngiapâna a châ hra. Thâtihpha Zawhana châbu ei palie khai, (ei patlô) zâ kha, khâ ei theih thlâh ha tyh. Ei châsoh (Pen) ta a chhana ei roh khaipa ta nahta, “Ei patlô haw” tahpa ta a paropa ta ei awh. Kô palih a vaw khôpa liata angâpô chakhyh rimâ lei awpa, rairuna chatôh awpa ta miah awtuhpa Khazohpa ta pahniena miah a piepa vâta eima nôvah ta eimâ ly hmeiseihpa a châ,” tahpa ta a reih.

Kô 1908 Pami 16, liata Mara châ tao khai ta Siku apadua pathao. Mizo (4) nata Lai (3) zy Siku kiapa ama chapa vata thlahno khawpa a cha. Marapa tawhta chyhsa (2) ama vaw y tawhta Siku pahy heihpa a cha. 1910 liata Siku hawti (30), 1913 liata Siku hawti (50) tahpa ta poh lymâ eih ta 1932 liata chanô achuna su eih-hrapa chysa(45) ta paduapa a châ. 1935 liata achupa (60) taihta ama poh.

Kô 1911 chhâna lâta Rev. RA Lorrain nata chhohkha cha London la sie y ta, kô 2 ama y chhoh ta, Thâtihpha Zawhana châbu, Mara reih ta ama palie chiehpa kha Britist and Foreign Bible Society liata pachhusa ei ta, Kô 1912 liata ama chhuh khai haw. Hla 70 a ypa ama pachhusa hra. Bie chhyna châbu tahpa ama pachhusa hra. Thlahchhâna dâh châhna tho ta hluhpi ama pachhusa hra. Pohthâ liata “ZISU KRISTA THISAIH TA MOLEI ZYDUA A PASIA KHAI HAW” tahpa hawhraw lai ngâsâpa nata â ngia ngaitapa ama parosa hra. “Five years in unknown jungles, for God and Empire” tahpa châbu chhao he chhupa châ ta, Mongyuh râh liata zuapa a cha.

Kô 1913 Phiata noh 13 ta London khihpi puasaipa ta Mara râh kaw pangai heih ei ta, Di thlah noh 10, 1914 ta Mara râh Saikao khih ama vaw tlo heih. Thâtihpha Zawhana châbu he Siku liata asaipa ta raipa châ ta, Khazohpa bie achuna châbu ta hmapa a cha.

Biehrai Thiehpa Mara reih ta paliena cha Rev. R A Lorrain ta pazao lymâ ta, Puhpa Saro ta abao lymâ ta, Kô 1917 he Mission chakaona kô 10 tlôhna chata Biehrai Thiehpa patlô awpa khoh kaw ta, Kô 1914-1918 chhoh he German adyuhna vâta dâh liata châpaphaopazy sie pha leipa ta, Culcutta lâta mopado awpa ta ama paphaopa he a tlô haw kaw tyh.  Chavata Biehrai Thiehpa châbu he charâta a tlô thei leipa a châpa ta ama reih.

Kô 1923 liata Biehrai Thiehpa palie khai hapa châ ta, Mopado awpa ta Culcutta lâ paphao khai hawpa châ ta châbu ta vaw pua awpa hâpa a châ. Mopado awpa ta ama kaw paphao pachhuahpa zydua a mohpado khai nahta British and Foreign Bible Society, Culcutta lâ cha paphao khai heih ta, Kô 1927 liata Biehrai Thiehpa Mara reih châbu cha papuapa a châ haw. Châbu pohpalôhpa moh cha “BIHRAI THIPA” tahpa a châ. He “BIHRAI THIPA” tahpa châbu he 1928 tawhta kô 1973 likawh hmâpa châ ta, kô 45 chhôh eima hmâh tahna a châ.

Biehrai Palie nota Rev R.A Lorrain ta rairuna â tyhpa

Eima Missionary Rev. R.A Lorrain ta Biehrai Khazohpa châbu Mara reih ta a palie nota Mara reih liata rairuna a tyhpa dei châ leipa ta, Lyurâhripa (Sâtâ) ta â patyhpamâ thlyu aw. Zâ kha cha Biehrai a palie ngâno ta, Lyurâhripa pôhpahrei kawpa, vyhkaluhpa nata rohchhie kawpa heta a vyhnaopa hmô ta palôhrupa lâta thata amâ hryupa ta a pahno. Lyurâhripa ta â vaw hnia rili nahta, Paw Khazohpa lâta Rev. R.A Lorrain cha thlahchhâ ta, Lyurâhripa chata a heisai haw tahpa reipa a châ tyh. Lyurahripa he Châsoh nata châti ta a vaw tahpa zy ama reih tyh. Palohrupa lata thapi ta Sâtâ nata eima Meipaw he ama hrao thlyu aw.

Biehrai Paliena liata Rev. R.A Lorrain nata Lyurâhripa cha amâ hryuh tyhpa vâta Rev. R. A. Lorrain chata, “Lyurâhripa nata keima eima hryuh ngalâ tyh, Ano ei hao, kei na hao hra” tahpa Hla he aphipa ta reipa a cha.

Biehrai parohpa Palie Pathaona nata Patlôna

Rev. R A Lorrain ta Mara reih ta Biehrai Thiehpa a palie khai nata 1923 tawhta Biehrai Parohpa cha a palie pathao lymâ. Biehrai Thiehpa paliena liata baotuhpa Saro Nohro kha a bâhsai hapa vâta Biehrai Parohpa paliena liata baotuhpa phapa chyhsa pano a hnei heih. Amo cha Nyusa Azyu nata Hrachhô Hlychho zy ama châ. Eima Missionary chhohkha he ei (3) na ta London a pina su khihpi lâ he 1934 ta ama sie heih.

Rev. R.A Lorrain nata chhohkha cha ama piapa A.B Foxall he Pastor chahnaopa ta Rev. Albert Bruce Lorrain Foxall tahpa moh paphaopa ta Mara râh la avaw chhih ei ta, 1935 kô chhana lâta Mara râh ama vaw tlô heihpa a châ. Kô 1936 tawhta Biehrai Parohpa Mara reih ta paliepa cha Rev. R.A Lorrain ta pathao heih ta, kô 14 chhoh ta Biehrai Parohpa châbu (18) a palie haw. Athaona tawhta apazipa ta apalie lymâ. Rai hropa nata châbu hropazy chhao taopa a hnei hra.

Kô 1937 liata cha Hratlu Nôhro, Saro Nôhro sawchapawpa ta Biehrai paliena liata vaw bao hra ta, Kô 1938 liata Rev. Albert Bruce Lorrain Foxall ta avaw bao lymâ hra. Ano ta a palie tuachaipa cha Esthy châbu he a cha.

1942 râhchhôh liata Adyuhna” Japan adyuna” ama tahpa vata Biehrai Parohpa ama palie cheihpazy mopado awpa ma paphaozy a daitih liata tlô tyh vei tahpa a châ. Japan adyuhna cha paru via lymâ ta eima Missionary chhôhkha chhao ama râh la a lie chyh awpa ta chhôpa ama cha. R. A Lorrain ta, “Marapa sawzy amâ râ n’awpa y hlei vei. Keimo chhao eima yna su puasai hr’aw ma pi. Marapa sawzy ama thi khai khiahtala keimo chhao thi hra aw pi ta, Marapa sawzy amâ boh khiahtala keimo chhao eimâ boh thlâh ha hra aw” tahpa ta â chhyh eih. Eima Missionary he a lôpô pasapa ta pazo sâh thei khao leipa chhao ta a kiahpâh liata pazô byh patyuhpa ta office liata Biehrai paliepa ta noh to, zâlâ taih â tyuh thlâh haw ama tah.

Kô 1944 athaona lâta cha eima Missionary tlâh leina he paru via lymâ hawhta, adyuhna vata Mara râh a kaw tlôpa Monyuh pheisai molaipa ta Mongyu râh la a chhi ta operation taopa ta patlâh awpa ta chho ta, chahrasala eima Missionary cha Mara râh liata lu a pabu awpa tlao â tlyh via haw. A piahpa Rev. Albert Bruce Lorrain Foxall (Vailipaw) hnoh ta, “Bruce y, Biehrai Parohpa ei hriapasana chhâhchabâhpa kha hmiatua chai ta raipipa ta vaw hnei mah y” tahpa ta a chakao tyhpa Abeipa Khazohpa hnohta, Hmypi 1 noh, 1944 liata â pahâ haw.

Rev. Albert Bruce Lorrain Foxall cha a puhpa ta bietai a ryuhipa hawhta, Biehrai Parohpa paliena rai cha pazao heih ta, abaotuhpa cha Puhpa Hratlu Nôhro kha châ ta, Ama pano ta phahnai a ngiah ngâsâpa ta hria eih ta, Pihnô Tlôsai (Vaili nô) chhao ta a bao tyh hra eih. Hria lymâ eih ta, Bible Society Calcutta lâta ama paphaopa a ki leipa zy vaw y tyh ta hriapasa ngaitahpa ta 31.12.1951 liata patlôpa a châ. Mopado a byuhpazy nata roh pathi abyuhpazy liahsa ama taokhai nahta Biehrai Parohpa kuropa (manuscripts) zy cha noh 23/7/1953 liata Bible Society Calcutta lâ ama paphao khai haw. Biehrai Parohpa châbu he Authorized version atlychakapa ta paliepa a châ.1954 nata 1956 likawh liata cha Bible Society tawhta ama mo chiehpa ama kaw paphaopa chiehpa zy mopado paphao heih tahpa ta hria lymâ eih ta, 1956 ko chhana lâta cha patlô khaipa châta châbu bukha ta taopa a châ. Châbu a siena lâta inches 6 chata a chhana lâta inches 4 rahchhôh a cha.

Kô 1956 Phiata thlah liata Mara Biehrai he a vaw tlôpa ta pahnopa a châ. Mara Biehrai Parohpa patohpatiahna chhôh zydua cha kô 33 ( Zisu Khizaw lia a cha rei kona tah a lyu) chhôh tlai daihti hmâpa a cha. Khazohpa chhihthana ta 1956 liata patlô khaipa a cha. Hallelujah!

Mara Awnanopa he Chin State liata Baptist Awnanopa nata Denomination hropa zy hlata Khazohpa Biehrai Pathaihpa châbu châ a hnei paki tua chaipa eima cha. Chin State liata chipho hropa zydua hlata a hnei tuachaipa nata Myanmar rah chhoh liata sâ (7) na liata eima châ.

Kô 1961 tawhta Rev. A.B Foxall, Pastor Heisa, Pastor Hratlu, Pastor Ithra Tluma, T. Laikai zy ta mopasia eih ta 1972 ta Biehrai Thiehpa nata Biehrai Parohpa pahlypa he papua heihpa a cha. Awnanopa ryureina khokheina ta kô 1992 liata Rev. T Laikai, Rev. NC Nôhrô zy ta hawraw zy paryhpa ta The Bible Society of India tawhta 1994 liata “KHAZOPA CHABU PATHAIPA BIHRAI PAROPA NATA BIHRAI THIPA, pahlypa “THE HOLY BIBLE: Mara-RV tahpa ta papua hehpa a cha.

Kô 2003 liata Hawtizy Bible palietuh awpa ta Rev. P. Riabi Machâ C. Zohupa nata Machâ A. Zakia zy raopa châta 2005 liata papua theipa a châ. He Hawtizy Biehrai lia heta Mara reih châ rozie thiehpa “ie” nata “h” baipa chi ta hmâpa ta ropa chata rohzie thiehpa ta roh tuachipa Biehrai a châ.

KHAZOHPA CHÂBU PATHAIHPA BIEHRAI PAROHPA NATA BIHRAI THIEHPA, pahlypa “ THE HOLY BIBLE: Mara-CL tao awpa ta Rev. Dr. T Laikai, Rev. K. Itei nata Rev. Nôhro zy atlypa châta, 2007 Phiatah noh 7 ta released pa a châ. Centenary kô achâpa vata “Centenary Bible” tahpa ta mo biepa nata pahnopa châta, THE HOLY BIBLE, MARA- CL (Common Language) tahpa a châ hra.

Kô 2010 nata 2011 liata Mara Biehrai paliena rai he Rev. NC Vabeilua he pahriasapa chata kô 2012 tawhta 2015 taihta Rev. J.R. Sanga he ama pahraiasapa a châ. Kô 2016 liata Mara reih ta Biehrai paliena rai hria awpa ta a tly pathi heihpa chata, atlypazy cha:

1. Dr. Lai-u Fachhai
2. J.R. Sanga
3. Dr. T. Laikai
4. Dr. K. Itei zy ama cha. Checking Committee chhao padua a cha hra.

He Mara Biehrai palietuhpa zy he ta tahma he amah hria lichi a cha.

Chârohtuhpa Remark:

1. Bible Society of Myanmar ta 2016 Bible Society Sunday ahmana chata a papuapa guide bu liata 1955? tah ta 1956 a châ.
2. Mara Evangelical Church he Bible Society of Myanmar liata Member châ awpa atei lymâ awpa abyuh hmeiseih.
3. Biehrai Palie (Translate) vaw pathao ta a patlô leipa zy hlupi ama yna liata Mara Biehrai he Myanmar râh liata sâ (7)na Chin State liata sa(1) na liata eima ypa he Khazohpa reithai sila, Missionary zy nata hmiatua Awnanopa nôpawzy hriapasana he pahno kheithai kawpa ta alyna bie eima hlâ cheingei awpa a châ.
4. Mara Biehrai Silver Jubilee nata Golden Jubilee zy aronah kawpa ta eima tao theileipa chhao ta, Diamond Jubilee he a rohnah kawpa ta taopa ta, eima pathipaloh nata eima hneina zydua pasai awpa he a phu hmeiseihpa a cha. Eima bona châ tlô ta!
5. Biehrai palie awpa ta Mara Biehrai ama palie hlata a vaw pathao tuapa nata Missionary ahneituapa zy ama yna liata eima Missionary hmotaopa ronah zie he alyna bie hlâna nata Mara Biehrai pasiepakaona, hmapasiesana, palaiseisana lia chhata, eima tiama via lymâ awpa a byuh!
6. Chipho lai viapa zy ta ama Biehrai he verson sâ (2) sâ (3) taihta ama taopa hawhta Marapa chhao he, Version hlupi a hneithei hra tahpa pachâna phapa hnei awpa a pha.
7. Mara Biehrai eima hneipa eima lyna palasana he Diamond Jubilee taona nata hmiala Mara châ nata reih palaisei sa nawpa ta Mara Biehrai he reih tyh sila Mara châ nata reih he palaiseisa su!
8. Eima pikheipa reih nata châ ta Biehrai rei awpa he hmô rohnah kawpa a chapavata ama chipho reih ta Biehrai ahnei mah leipa zy nata hnei hawhta pitloh mah leipa eima Mission field liata chipho zy châta tiama lymâ sila thlahchha sila lâthloh tlua khei lymâ su!
9. Mara reih nata châ he reih hropa nata châ hropa hlâta a nanoeih-na y ta, chachah Mara reih nata châ a kathuna, athlôhna chata Mara Biehrai liata aypa hlupi eima hmo.

Mara Reih Apha via pachaina

Reih hropa hlata Mara reih nata châ a phavia pachaina nata a tlôhpaki viana hlupi a ypa hry ta a ryh lapa Mara Biehrai liata aki viapachaina he ei vaw palasa kho kaw.

1. “Awnanopa” tahpa hawhraw Mara reih nata châ he reih hropa hlata apaki viapachaina hawhta ei pachâ. Church tahpa he Krika reih tawhta avyhpa chata a yzie cha “Awnanopa” tlâ he a cha. Mara reih he a pha kaw tlaina! A ki kaw tlaina!
2. Zawhana 3:16 liata Khazohpa ta khizaw kyhpachâ nagiatah ta, a tahpa liata “khizaw tahpa hawhraw a hmapa he Mara Biehrai a tlôh paki viana hawhta ei pachâ. Reih hropa hlata Mara reih ta kyhpachâna tahpa tlai he a kathu kawh ta yzie hneituh hawhta Mara châ nata reih ta taopa Mara Biehrai hela a thlôtuh hawna ei ta tyh. Kyhpachâna tahpa Mara reih thlôh zie he!
3. Biehrai tahpa hawraw he Mara reih nata châ he rei parohpa nata a hnia chaipa rei châta reih hropa hlata apaki via pachai heih hra. Biehrai tahpa Mara Hawraw hi !
4. He hawhta Mara Biehrai eima hneipa vata bie kathu kawpa Khazohpa bie eima padi theihpa eima hneipa hlupi a y holo aw. Eima study via awpa chhao a pha kaw hra. Rei hropa a pha viana hlupi a y thei hra aw chahrasala keima la Mara Biehrai he ei paphasa kaw tlaina! Mara Biehrai he ei paso chaina!

Mara râh he Miisionary zy ta pua sai khôh vei eih. Vailino cha tlâ leipa ta y ta Thohna a kia Thohna kiana su Luhdiana chata a tlâ leina parupa vata a paha hawh ta Ludhiana liata pabupa a cha. Ama pabuna liata Mara alei he aziana liata pabupah pa a cha. Kô 20 hlei tawhta Arupa he Saikao la kaw phaopa chata, cha liata a Viapakao he rao tlâ leipa ta hmôpa a cha. Khazohpa ta Missionary zy hmâpa ta byhna eima topa rei pati nawpa ta tahma ta eima duahmo he pachâ sila hlasâtuhpa ta byhnâ reih la miakha miakha ta a tahpa kha.

Biepachhana

Biehrai he Khazohpa husothlupa hrona bie châta eima theithaipa hawraw eima châ nata reih tlaita, rei awpa eima hneipa he a ronah tu haw! He Mara Biehrai heta chipho ronahpa nata Khazohpa photlypa phopi ta mia tao hawhta eima ly ngai takaw! Missionary zy taophana he my leipa ta alyna bie reina nata Khazohpa reithaina he bah leipa ta chakao sila, Mara Biehrai: Châ nata Reih chhao he palaiseisa awpa taovyu ronah kawpa eima hneipa my kha ei su! He chakaona taovyu he a ngiachhiena zawzi ta eima topa châ tlô ta! Mara Biehrai mia a pietuhpa Khazohpa moh ronah rilisala, Mara Biehrai he hro parei sala laisei lymâ mawh sy!

Mara Biehrai he keima chatala rei hropa zy hlata angia chaina! Athloh chaina! Apha chaina! Apy pa-i leipa ta ei thei vana! Pahna (Kiss) leipa ta y thei vana! Rei leipa ta y thei vana! Mara Biehrai na ngia chai tlaina! Hallelujah! Mara phopi paduatuhpa Khazohpa moh reithaipa châ mawh sy!

Châbu rei awpa zy

Zakia, Macha A. 2016. Lakher Pioneer Missionary zy nata ama Hrialahpazy Chakaona:

Biehrai nata Hlabu. ECM Publication Board

Parry, NE. 1932. The Lakhers. London: McMillan

Lorrain, RA. 1912. Five Years in Unknown Jungle: For God and Empire. London:

Lakher Pioneer Mission

Fachhai, Laiu. 2015. Khazoh Photlyh Mara Phopi.  Maraland Publishers, College Vaih, Siaha

Mizoram, India

Sakhong, Lian H. 2000. Religion and Politics among the Chin People in Burma (1896- 1949). Department of Theology, Uppsala University

Beita, Peter Bei Chatlai. 2016. “Maraic Language Group Thiehpa he Rev. Lorrain’s Vision

Hlaotlohna a lyu kaw” in Mara Deiva. MSA.