Mara Holy Bible Kô 60 a vaw tloh haw

Rev. Dr. FC. Beichô,
Executive Secretary (Education),
ECM Hqrs. Siaha.

Marapa sawzy pi he chi nata pho vâhne ngaitapa eima châ. Thlarâh thlâpâ noh 26, 1907 liana khata Paw Khazohpa ta missionary Rev. Reginald Arthur Lorrain nata a lahpinô Maud Louise Lorrain maniah vaw pie ta. Âmo chata Mara reih Châhnawh(A, AW, B), Pamih thlâpâ noh 16, 1908 liata m’iah taopa ei ta. Thlazoh thlâpâ noh 24, 1908 liata Mara reih ta châ achuna o(Siku) maniah ama paduapa haw. He hawhta missionary thatlôpa nata sia ngaitapa m’iah pietuhpa eima Khazohpa cha reithaipa ta y mawh sy.

Châ achuna cha Thlazoh thlâpâ noh 24, 1908 liata pathaopa châ ta. Thlarâh thlâpâ thla khophie liata cha Siku hawti pahrawhhleikha ama vaw châ haw. Nohchhô lâta Rev. R.A. Lorrain cha Siku hawtizy châ pachu ta; Thlarâh thlâpâ noh 16, 1908 tawhta azo lâta Thâtihpha Zawhana Châbu Mara reih ta a palie pathao.

Siku mohôhna kyh lâta sôh a phahlana vaw y ta. Amâ phahlana pazao awpa ta Rev. R.A. Lorrain cha ta châzy papua ta. Baona charâ ta a ma hmô khao vei tawhta cha Phiata thlâpâ thla thaona tawhta siku cha khawpa vaw châ ha ta. Rev. R.A. Lorrain cha siku khaw chhô ta ryhpaohna lapa ta, Mara reih nata English reih Dictionary tao awpa nata Thâtihpha Zawhana Châbu, Mara reih ta paliena liata a daihti zydua a hmâh khai haw.

Kô 1909, kô athaona liata Rev. R.A. Lorrain cha Tisôpi khih lâ kaw tlyh ta. Tisôpi beipa laikah liata Rev. R.A. Lorain cha a pakyh ei ta. Rev. R.A. Lorrain chata tlaikao reih ta bie reih ta, a bie a reipa maih, Saro Nôhro he ta vaw pahno thai ta, mo hropazy a chho pachhuah tyh ei. Rev. R.A. Lorrain chata Saro Nohro cha Biehrai paliena liata Tlaikao reih Biehrai Thiehpa tawhta a bao thei nahta pangiasa ta, baotuhpa châta Saro Nohro cha a hrua haw.

Thlarâh thlâpâ, 1909 liata Saro Nôhro cha a chhôhkhazy siesaipa ta Rev. R.A. Lorrain bao awpa ta Saikao khih lâ a zu haw. Rev. R.A. Lorrain sa Saro Nôhro cha Mara châ pachu ta. Sâro Nohro cha chyhsa sopa nata novâh kawpa châ ta. Châro nata Chârei thai patoh ta. Rev. R.A. Lorrain cha a bao thei haw.

Thâtihpha Zawhana châbu, Mara reih ta Thlarâh thlâpâ noh 16, 1908 liata palie pathaopa cha kô 1911 chhôh liata palie khaipa châ ta. Thâtihpha Zawhana Châbu a palie khai zâ liata Rev. R.A. Lorrain ta, “Hurray, Ei Patlô haw,” tahpa ta a ku avâ lâ chaluahpa ta, a paro ngâsâpa ta a awpa ta a reih. Thâtihpha Zawhana Châbu cha British and Foreing Bible Society liata asaipa ta pachhuhsapa châ ta. Kô 1912 liata papuapa a châ. Marapa saw, châ a reih thaipa maih hnoh ta asaipa ta ama pie hra.

Rev. R.A. Lorrain nata Puhpa Saro Nôhro chata Biehrai Thiehpa Châbu, Mara reih ta paliepa cha pazao lymâ ei ta. Biehrai Thiehpa châbu cha kô 1923, Phiata thlâpâ liata palie khai ei ta. British and Foreign Bible Society, Calcutta lâ paphao ei ta. Kô 1927 liata Biehrai Thiehpa châbu cha papuapa a châ haw.

Rev. R.A. Lorrain chata Di thlâpâ noh 4, 1923 tawhta Biehrai Parohpa Zenesi(Âthaona) tawhta Mara reih ta palie pathao heih ta. Puhpa Saro Nôhro ta a bâhsai hapa vâta baotuh hropa Nyusa Azyu nata Hrachhô Hlychho hnei heih ta. Kô 14 chhôh ta Biehrai Parohpa châbu 18 Mara reih ta palie khai ta.

Kô 1937 liata Satliapa Hratlu Nôhro, Saro Nôhro Sawchapawpa ta Biehrai paliena liata vaw bao ta. Kô 1938 liata Rev. A.B. Lorrain Foxall ta vaw bao hra ta. Rev. A.B. Lorrain Foxall ta Biehrai Parohpa a palie tua chaipa cha Esthy châbu a châ. Châbu palie chiehpa zydua Bible Society lâ paphao chhyh ei ta. Kô 1942 liata Japan adyuhna vâta Châbu apaphaona rairu ta. Rev. R.A. Lorrain cha chiehleina ta by ta. Hmypi thlâpa noh 1, 1944 liata a chakao tyhpa Abeipa Khazohpa hnoh ta â pahâ haw.

Biehrai parohpa paliena rai cha Hratlu Nôhro, Rev. A.B. Lorrain Foxall nata Pihnô Tlôsai ta pazao ei ta. Biehrai Parohpa cha Noh 31.12.1951 liata palie khaipa châ ta. Mopado khaipa a châ tawhta Noh 23.7.1953 liata Bible Society, Calcutta lâ paphao khaipa a châ. Kô 1956 liata Biehrai Parohpa Châbu zydua, âkipa ta Phiata thlâpâ 1956 liata Châbu sâkha ta a vaw pua khai haw. Thlarâh thlâpâ noh 16, 1908 tawhta Mara reih ta Khazohpa Châbu Pathaihpa palie pathaopa cha Phiata thlâpâ kô 1956 liata patlôpa châ ta. Kô 1956-pa liata Marapa chyhsazy Khazohpa Châbu Pathaihpa eima hnei paki hapa vâta Abeipa eima Khazohpa moh cha reithaipa ta y mawh sy. Atakô 2016 he Mara chyhsa ta Khazohpa Châbu Pathaihpa eima hnei tawhta kô 60-na, Diamond Jubilee eima vaw tlô haw. Marapa saw zydua ta aly ei sih la, Abeipa moh cha reithai lymâ rili ei suh vy.

He Biehrai Thiehpa nata Biehrai Parohpa, eima missionary-nahzy ta maniah ama taopa he Bu kha ta pahlyh awpa ta Biehrai paliena rai ahriatuhpazy cha Rev. A.B. Lorrain Foxall, Rev. K. Heisa, Rev. Ithra Tluma, Rev. Hratlu Nôhro, Rev. J. Haotha, Puhpa T. Laikao zy ama châ. Mopadotuhpa ta raopa Rev. Ithra Tluma nata Rev. J. Haotha, Rev. K. Itei, B.D â chu haipa ta a vaw bao hra ei.

He Biehrai Parohpa nata Biehrai Thiehpa pahlyhpa châbu he Hmypi thlâpa noh 25, 1973, Abeipanoh, Siaha Vaihpi liata Assembly hnei nota palâhâpa a châ.

Mara Chyhsa Bible(Biehrai Châbu) eima hnei heihpa hropa cha HAWTIZY BIBLE a châ. He Châbu he apalietuhpa Machâ C. Zohupa nata Machâ C. Zakia châ ei ta. Amopadotuhpa cha Rev. P. Riabi a châ.

He Hawtizy Bible he Khihpa thlâpâ noh 6, 2005 liata Siaha Vaihpi Achhyna O liata palâhâhpa a châ Marapa sawzy ta Biehrai nanopa eima hnei heihpa cha Good News Bible, Today’s English Version tawhta paliepa châbu châ ta. He Châbu he Bible Society ta palie awpa ta maniah ama tahpa a châ. KHAZOHPA CHÂBU PATHAIHPA(The Holy Bible Mara-CL) eima hnei hrapa he Biehrai Mara reih ta apalietuhpazy cha Rev. T. Laikai, Rev. K. Itei, Rev. RC. Nôhro zy ama châ. Amopadotuhpa Machâ A. Zakia a châ. He Biehrai châbu he Phiata thlâpâ noh 7, 2007 ta New Colony Achhyna O liata palâhâhpa a châ.

Thlarâh thlâpâ noh 26, 2007 Awnanopa kô 100 tloh tawhta Mara Biehrai palie pathi awpa khona hneipa châ ta. Kô 2010 tawhta kô 2011 taih Translator châ ta Rev. NC. Vabeilua raopa châ ta. Kô 2012 tawhta kô 2016 taih Rev. J.R. Sanga ta Translator rai hria heih ta.

Kô 2016 tawhta Biehrai paliena liata hria awpa ta raopazy cha hezy he ama châ:

1). Rev. Dr. Laiu Fachhai, Chief Translator
2). Rev. J.R. Sanga, Translator
3). Rev. Dr. T. Laikai, Translator Consultant
4). Rev. K. Itei, Translator Consultant

Âmo sahlao he raopa ama châ. Biehrai pha ngâsâpa papua thei awpa ta Awnanopazy ta thlahchhâkhei tyh ei suh vy. Âmo ry liana heta Checking Committee member 10 ama y hra. Chazy châta thlahchhâkhei tyh hra ei suh u.

He Biehrai, Khazohpa Châbu Pathaihpa chi nanopazy m’iah apietuhpa eima Khazohpa moh cha Tlyzaw nata Chhâzaw ta reithaipa ta y mawh sy.