KHAZOHPA BIEHRAI REIHNA NATA PHUAHNA DAH (HOMILETICS)

Rev.Vazilai
Registrar , Lorrain Theological College

Biedyhna

Awnanopa liata Khazohpa bie reina nata phuahna he peimawh kawpa sâkha a cha. (Rom. 10:14; Mt.10:8). Awnanopa sahlao he thlahpa nata sapa liata pasa awhpa liata Khazohpa bie tawhta eima pasa awhpa a cha. Khizaw hmasiena, thaisohna nata a hmiepa yzie a hneipa ta Khazohpa bie he phuah thai awhpa a peimawh hmeiseih. Chavata Khazohpa bie reina nata phuana dah/kyh he a tlapipa ta eima pachapahmao awhpa a cha. He liata palasapa he sermon rei awpa liata a chyhta chha a cha bao thei khia tahpa ta pachhuahpanohpa chata nama pachhupatlaina nata pachâna (Creative Idea) hneina liata a pahnieh awh.

A. Pachalyma Awhpa

Chyhsa zy hnota Khazohpa bie eima phuah awhpa vata eima reih hlata aryh latapa he eima pachâ awhpa a cha.

1. Khapa vata ei reih/ phua aw? (What)
2. Ahy zy châta ei reih/phua aw? (Who)
3. Khapa su e a cha? (Where)
4. Daiti khazia chhoh e ei reih/phua aw? (When)
5. Khei hawta ei reih/phua aw/ei y aw? (How) tapa zy he pachâna chota Khazohpa bie rei/ phuah awhpa ta a pachhuahpanoh awhpa a cha.

B. Khazohpa Bie Reihtuhpa

Khazohpa bie reihtuh awhpa cha;

1. Khazohpa awna ao a pahnopa
2. Khazohpa a bohchhapa nata angiapâpa
3. Thlahpa tawhta lyma (gift) a tohpa a pahnopa
4. Kho pasana ahneipa/ Hro atyhpa a hneipa
5. Biehrai nata Châbu zy reih apapahapa (Achuna atiama pa)
6. Krizyhna a papeimawhsapa
7. Pachâna phapa ahneipa (Vision)/chataw (Goal ahneipa)
8. Palohru phapa a hneipa (Positive Mind)
9. Ahnatlâna a phapa zy ama cha awhpa a cha.

C. Sermon Reihna Chi zy

Khazohpa bei eima reih awpa he khapa sermon chita e ei reih aw tapa pasiapanoh awhpa a cha. Sermon reina chi zy cha;

1. Hrohsopa rein dah (Prophet Sermon)
2. Bietla/luh taw pata rein dah (Topical Sermon)
3. Chhohpasiapa ta reina dah (Expository Sermon
4. Biehrai boh nata chah tawhta reina dah (Text to Context)
5. Châna duahmo tawhta reina dah (Context to Text)
6. Thapatlopa ta reina dah zy he a cha. (Exhortation)

Khei hawhta eima reihpa chhaota phono ta pachhai theipa a cha. Chazy cha;

1. Ngiapana apyhpa (Doctrine nata a zaopa Theological Sermon
2. Hrozie nocha (Morality) nata a zaopa Ethnical/Ethical Sermon tapata a cha.

Khazohpa bie eima reihpa eima tapa he eima noto hro tawhta nata eima tyhpa zy tawhta Beihrai bie pakao/pahmie/tluapa tapa (Context to Text-Content) nata Biehrai bie tawhta eima noto hro lâta a heipa ta reina (Text to Context) tapa ta a y. Eima reih khohpa nata Biehrai bie he ahmie/a kaw awhpa a cha.

D. Sermon Sakha Taona

Sermon sâkha tao tita eima bona cha Biehrai he a cha awpa a cha. Sermon sâkha pachhuah-pano awhpa a cha tita Bie pachhaina he sâ (3) he a y lymâ awhpa a cha.  Chazy cha Biehmiapa; Biechhoh nata Biepachhana zy he a cha. Chavata sermon sâkha he eima roh cheingei awhpa  a byuh. Sermon sâkha liata a ypa he sâthoh he a zaona a hnei khai awhpa, a pokha awpa, A aoh-atla awhpa, a chhah-chhah ta a siepa, chhana a hneileipa (apazao thai awhpa ) a cha awh. Hlasapa nata Biehrai reipa zy duah ta Sermon a deichhypa a cha awhpa a peimawh hmeiseih. Chavata Programme sâkha he peimawh ta Chairperson chhao a peimawh kawpa a cha. Programme khô lapa he pabuatuhpa tlao a cha tyh. Programme liata pahlao tlâh a cha chalei pachâ khai tawhta pahlao/phua tyh awhpa a pha kaw ta raw!

1. Biehmiapa reina dah

Biehmiapa reina liata minuta (5) hla pasi via lei awhpa a cha. Sermon sâkha liata Biehmiapa he athaona a cha vata a peimawh kaw. Biehmiapa ta nathlie tuhpa ama paha theinawpa ta pahruana nata lâthlo tao awhpa a cha. Biehmiapa he Biechhoh deichhyna chata hmâ awhpa a cha. Biehmiapa ta zawpi palôh patuh awpa achhuah awpa a cha. Biehmiapa liata a hlao awpa zy cha : Alyna bie reina deita, Biehrai reina nata hmiapahnosana, Biehmia liata rei lei awhpa zy cha; Dyu eima tlai leina, Biechhoh nata azaona  a hneileipa bie nata theithai a chhileipa bie nathlie kho achhi leipa zy a cha. Biehmiapa he pachhohsala, siano sala y zie a hnei kawpa bie a cha awhpa a cha pavata roh cheingei awhpa a byuh.

2. Biechhoh Reihna Dah

Biechhoh he eima chhuahpa reina su a cha. Biechhoh liata chi tho tai pachhai thei heihpa a cha. Biechhoh he minute (20) ta pachha thei awhpa ta eima chhuah aw. Biechhoh eima reipa he achhah-chha ta rei awpa a cha hrapa vata roh awpa a cha hra. Biechhoh liata Pakhona bei, phôhpa, chhoh pasiana, Mo pathaipazy bie reihpa hawpa zy hmâpa ta theithai awhpa nata athla-azi kawpa ta rei awpa chata reituhpa ta achhuahnazy he a pha kawpa ta a rei awhpa a cha.

3. Biepachhasa na

Biepachhana he Sermon sâkha liata hnochaipa bie chata a nathlietuhpa ta eima reihpa biechhoh tawhta thlai hriapazi thai awhpa nata thlai hriapazi khôh-na a hneithai nawpa ta reih thai awhpa a peimawh kaw. Na thlietuhpa palôh a pahniepa a cha awhpa a byuh. Biepachhana he minute (5) hlâta hlu via lei awhpa a pha. Biepachhana he Beihrai bie, hriahrina zy ta pachha theipa a cha. Anodeikuala nathlie tuhpa palôh a paty-pama awhpa cha vei. Thlahlôhna nata hnangana, thathyuna nata riaphana a pie awhpa a cha. Achha chaina tapa hmâ hlupa cha vei.

Sermon tuhpa Tao awpa

1. Note bu hnei awpa; Na palôh cha hriapa châ/bie, natheipa bie napalôh liata avaw lapazy roh tyh awpa.
2. Khitla hro, khizaw a sie haipa pahno awhpa nata achu awhpa
3. Ama paha kheipa hlâta ama ngiapa pachâ awhpa
4. Eima reikhohpa pasiapano awhpa
5. Sermon tao awpa ta Daiti pie awhpa
6. Thlachhahna chota ahlâ awpa
7. Na reih khohpa zy rohla, pachâ heila, rei tua raila pathluapa-thla la pamoh-pathaw awhpa
8. Bie phapa, athlôhpa, hawraw khôh chhipa tlua awhpa
9. Rei awpa na ngiatia leina taita pachhuapanoh awhpa
10. Atobi pha/thai awhpa
11. Biehrai natlypa hmiahno /Ref. zy reih ha awhpa
12. Biehrai kheihawpa tlyma apyh leipa hawhta reina cha hri awpa
13. A siakawpa nata zawpi theipa ta reih awhpa
14. Ao papuana, kuphei, mokhao, hmiaphao dah zy thai awhpa.

Taolei awhpa

1. Pahnopasia leipa, theithai a chhih leipa zy reih lei awhpa
2. Thlachhahna he Maisa liahnei chanie khao leipa
3. Hala lei awhpa nata A cha lei awpa
4. A rei khohpa (achhuahna) anano pa Biehrai atly pabao leipa
5. Keimo khohpa hlao patlô awhpa nata keimo mopathana tlua leipa
6. Napachâpa sâkha na papha sapa vata thlai rei chakhy lei awhpa
7. Chyhsa panano leipa
8. Pakhohpana tapa bie reihlu leipa
9. Palohru chhiepa phaoleipa
10. Rai naopa dei tlua leipa
11. Chyhsa hropa reihpa copy tao awpa cha vei
12. Bierei chipa reih chanei lyma awhpa chavei
13. Sukha lâta dei ta a heih awpa chavei
14. A pilyu tuhpa cha hra vei
15. Pangiasapa reih awhpa chavei
16. Chyhsa hropa reih doleipa kyh reih awhpa phavei
17. Pachisana hmâ lei awhpa
18. Khazohpa nata Thlahpa Pathaihpa moh hraolei palia hmâ awhpa chavei
19. Thlarahna hneileipa, Bie atai leipa.
20. He leipa tala tahpa ta conclusion na tao awpa cha vei.