He Article pha kawpa he Rev. Dr. Zodau ta November 19, 2016 noh ta taopa Mara Evangelical Church Lialaita Bia Ryureina & Seminar liata a reipa paper acha.
Khaina Bie Pahnosatuhpa: ZAWHANA
Rev. Dr. Zodau
Biehmiapa
Atakô Lialaita Bia ryureina liata bietlâhpipa hmâpata Seminar tao thei awpa nata cha Seminar liata kei chhao paper a reituhpa ei vaw châpa vâta Abeipa moh reithai nata nama zydua chô liata chhao a lyna bie ei cha hlâ ei. Eima bietlâhpipa cha Thâtihpha Zawhana châbu tawhta, “Khaihna bie a pahnosatuhpa” (1:8) he a cha. Thâtihpha Zawhana châbu rohtuhpa ta khaihna bie a pahnosatuhpa a tahpa he Zawhana (Batituhpa Zawhana) he anuapata a rei ngapa eima pahno. Cha khiah cha cha “khaihna bie pahnosatuhpa” kyh achu awpa khiah Zawhana thâtih achu awpa tlao a vaw cha hri. Chavâta he paper heta Zawhana (Batituhpa) hrozie a chuna tawhta khaihna bie pahnosatuhpazy hrozie saipazih awpa achhuahna a hnei.
Zawhana Thâtih chyupa
Zawhana he Thâtihpha Zawana châbu liata chyhsa moh palâsa tua chaipa a cha. Châbu rohtuhpa ta Zawhana he Batituhpa tahpa palâsa eih vei hra sala, 1:25-33, nata 3:23 liata bati a pachasa ngapazy mopata Thâtihpha châbu hropazy liata Batituhpa Zawana ama tahpa nata chyhsa a lyupa ama cha. Anodeikua Zawhana he Thâtihpha Zawhana châbu liata cha ano he “Pahnokheituhpa” tahpa ta adua khei pachai ta, pahnokheituhpa a chana zie cha batituhpa (baptizer), tlâh-awkheituhpa (herald), hmiasahtuhpa (forerunner), teacher (pachutuhpa), nata mei-ôh (lamp) tahpa ahropa ziazâhzy ta a chhopasia hra.
Zawhana: Pahnokheituh phapa
Thâtihpha Zawhana châbu biehmia liata Zawhna cha Khazohpa Khaihna (Zisu) a châhkheituh awpa ta Khazohpa ta a raopa hawhta a palâsa (1:8). Zawhana châbu liata achâhkheina raihria he aeichhiana nata akhona duahmo liata hmâpa a cha. Chavâta reihkâh nata ziazâh lia chhaota a chado ngasa awpa a cha. Pkn ta, Zhn 9 liata mochaopa cha Zisu achâhkheina liata hawhrawh hmana kyh a sosi ngasa (Zisu kyh a reina liata paha noh a paraopa a châ lei nawpata Zisu aboh thei nawpata hawhrawh ahmah: i) Zisu moh palasa vei. ii) Zisu ta chheitlô “tao” ta ei mo liata ei na “hnia” (9:6, 11) tah leipa ta Zisu ta chheitlô ei mo liata na “hnia” ta a tah (9:11). iii) Zisu ta “vawh la, tipo liata a pasi ma y” tahpa rei khao leipata a zawpakhô. Cha hawrawh hmadâh zydua cha Zisu pabohsana châta a cha.
Zawhana ta Zisu a châhkheina chhâpa cha chyhsazy ta Zisu ama vaw ngiapâ ei sala chhazaw hrona ama vaw hnei thei nawpata a cha (1:7; 3:36; 20:31). Cha achhuahna cha Zawhana chakaona zy liata hmô thipa a cha. Pkn. ta Zawhana ta apachupazy cha Zisu cha pahmôsa eita, cha tawhta amo cha Zisu zi haw eita (1:35-39). Cha khai tawhta apachupazy cha Zisu liata ama ngiapâ haw (2:11). Bethani khih liata cha Zawhana ta Zisu thâtih a vaw rei chhielie hawpa vâta Zisu Bethani a vaw pha nata a khihsaw hluhpi ta Zisu cha anao tata ama vaw ngiapâ haw (10:40-42). Chavata Zawhana châbu liata Zisu achâhkheina achhuana he cha apeimawh kawp subject a cha. Samari chanô achâkheina vata Saika khihsawzy ta Zisu cha ama vaw ngiapâ haw (4:28-29). Zisu pachupazy achâhkheina chhao Zisu ama vaw ngiapâ thei nawpata hnabeiseihpa a cha (17:20). Thâtihpha Zawhana châbu chhao he “Zisu ama vaw ngiapâ ei sala chhazaw hrona ama vaw hnei thei nawpata” a cha (19:35; 20:31). Chavata Zawhana cha chyhsa zy ta Zisu Krista ama vaw ngiapâ thei nawpata Khazohpa ta khaihna bie pahnosa awpa ta a tlypa a cha. He hawhta “achâhkheina” (testimony) tahpa cha keimo kyh châ leipata Zisu Krista kyh nata Zisu pathâhna kyh a cha hri awpa a cha.
Zawhana: Batituhpa
Synoptic Thâtihpha châbuzy ama tahpa Mathai, Maka, Luka zy liata cha Zawhana he Batituhpa ta pahno chaipa a cha (Mk. 1:4). Thâtihpha Zawhana châbu liata deikua batina he ano chakaona chhana chaipa châ vei. Chahrasala Zawhana châbu liata chhao bati chakaona cha a y pyly (1:25-33; 3:23; 10:40). Anodeikua cha a bati chakaona chhao cha Zisu a pahnosatuhpa a chanazie ta chhopasia awpa a cha. Achhapa cha ano he Mesia a pahnokheituhpa ta a palasa (1:31).
Zawhana he chakaona raihria râhpathohpa liata a pathao, a eih viapachai ta Peria liata Bethani nata Samari râh liata Anawna likâh liata acha (1:28;3:23). Cha yzie cha Isai 40:3(1:23) hawhta Biehrai parohpa liata Mawsi nata Davi duahmo mopata chakaona châta a patohpatiana daihti tah theipa a cha. Mawsi kô 40 râhpathopa liata a yna cha Israel chhihtuhpa a châ thei nawpata pachapa a chapa hawhta David ta mietaku vaipa ta râhpathopa liata a ypa cha Izrael beipa a cha thei nawpata a patohpatiana a cha hra. Râhpathopa chakaona daihti khai tawhta thlai Khazohpa tawhta pachhana daihti thiehpa a vaw luah tyhpa hawhta Messiah a vaw luah nawpa a palâsa. He achhuahdyna Isai 40:3 Izrael nawh padua heihna cha batina chakaona liata ahmapa vâta bati chakaona a pathaisana he Zawhana châta Messiah a vaw luah awpa châta a chhuahdy chhieliena a cha.
Zawhana batina nata Zisu batina he eima mo tita, Zawhana batina cha ti ta batina a cha (3:22,26; 4:1). Zisu batina deikua Thlapa ta batina a cha (1:33). Zisu batina deikua cha chyhsa pathaisana (1:29; 13:14). Chavata Zawhana châbu liata Zawhana batina cha synoptic châbuzy liata molei rona batina hawhta chaleipata Zisu batina pachhana rôhnahpa reichhieliena deita a cha. Hmiatuata Zawhana chhaota Zisu cha ahyma tahpa pahnopasia leipata, anodeikua ano hlata alai viapa, a rônah viapa tahpa ta pahno ta, miakha a pahnopa cha ano (Zisu) chô liata Thlahpa pathaihpa a vaw chohpata a vaw y tahpa he a cha (1:33). He he Zawhana ta batina chakaona chhapa cha a cha (1:31).
Chavata keimo khaihna bie a phuahtuhpazy ta: 1) a patohpatiana eima hnei awpa a cha. Cha cha Zisu Krista moh a rônah thei nawpata a cha aw. Eima chakaona chhao keimo mohphana awpata chakao leipa pita, Zisu Krists moh rônah nawpata a cha hri aw.
Zawhana: Tlâh-awkheituhpa nata Hmiasahtuhpa
Zawhana cha ano sasyh ta Zisu hmia lia atyupata Zisu tlâh-awkheituhpa hawhta a hmô (1:15,27,30). Chahrasala, Zawhana ta Zisu cha ano y hlata a y hawpa nata a rônah viapa ta a reih (1:1-2, 15, 27, 30). Zawhana ta Isai 40:3 hmapa ta “keima cha râhpathohpa liata tlâh-awkheituhpa”, cha tlâh-awna cha Abeipa lâthlô a chhuahdy awpa “lathlô akopa, a chahrâhpa, etc.. patlâ ta pamih awpa” rai a cha (1:23). Abeipa lathlô cha Khazohpa pachhana lathlô Zisu ta a vaw tlôkhei awpa a chyhsazy châta puasaina thiehpa a cha. Chavata Zawhana ta tlâ a awkheipa cha “Zisu cha Khazohpa ta atuapa Messiah Izrael chyhsazy châta pachana (puasaina thiehpa) a vaw tlôkheituhpa a cha” tah he a cha. Chavata Zawhana ta Zisu cha tlâh-awkheina ta pachhana a vaw tlôkhei awpa tahpa ta a châhkhei.
Zawhana: Pachutupa (Rabai)
Zawhana cha 3:26 liata “Rabai” tahpa ta awpa a cha. Cha yzie cha “pachutuhpa” tahna a cha. Zu nawhta pachutuhpa tah thei awpa cha a pachupazy (azituhpazy) ahnei awpa a cha ama tahpa hawhta Zawhana cha azituhpazy ahneipa a cha (1:35; 3:25). A rabai châna hmâpa ta azihtuhpazy kha Zisu lâta achhihtha ei. A pachupa (azituhpa) pa 2 penawh kha Zisu hnoh zi awpata nata ano ama siesai awpa a chho ei. Zisu zituh hmiatuapazy he Zawhana zituhpazy ama cha (1:35-39). Zawhana zituhpazy cha ama rabai Zawhana hlata Zisu Krista a rônah via haw tahpa pahno haw eita (3:26; 4:1), Zisu lâta ama paly hawpa chhaota Zawhana cha papeisa tiahrah leipata (3:27-30), he chhao hma he ano chakaona liamaripa hawhta a pachâ (10:40-42).
Zawhana pachuna hmeiseihpa cha Zawhana châbu liata hmôpa y vei, chahrasala, a châhkheina biechhohzy deikua: i) Zisu cha kei hlata a peimawh via (1:15, 27, 30); ii) kei cha a vy awpa ama hapa cha vana (1:19-21; 3:28); iii) kei cha pachhana nata puasaina thiehpa a vaw phaoh awpa Zisu kyh a reih (1:23; 3:28); iv) Zisu cha moleina a siekheituhpa Mietakupa Taw (1:29); v) Zisu cha thlahpa ta batituhpa a cha, kei deikua tita bati chakaopa ei cha (1:26;33); vi) Zisu cha Myuh a cha nota keima cha taokhai ei cha (3:29); vii) Zisu cha a pathâh rili awpa a cha, kei deikua ei nawh rili awpa ei cha (3:30). Chavata Zawhana achâhkheina zydua he ano chakaona chata, Zisu hlata keima ei nawh via tahpa lâta chakaona sai a cha. Zawhana châta cha Zisu pahnona cha ano a panawh thaina a cha.
Zawhana: Zisu atyulahtuhpa (the best man)
Zawhana azituhpazy cha ama rabai Zawhana hlata Zisu Krista a vaw rônah via haw tahpa ama pahno nata Zawhana cha hiahri eita, Zawhana ta Myuhneituhpa viasa ei cha a tah (3:25-30). Myuhneithpa viasa tahna cha myuhneituhpa atyulâhtuhpa tahna a cha. Biehrai athaipazy ta Zawhana bo 2-4 he Zisu chakaona Kana tawhta Kana taih chakaona tah eita, he chhoh liata Myuthieh nopakiana duahmo hmapata Zisu kyh reina a y ama tah. Kana ahneina kyhchhi (2:1-12); Samari chanô nata Zisu a tyhna. Chazy liata Zisu cha myuhneituhpa ta a reih. Zu nawh culture liata chhaota ahneina kyhchhi liata myuhneituhpa atyukheituhpa cha myuhneituhpa pahnokheituhpa ta aduakhei aw. Chaata myuhneitupa pahnokheituhpa cha ta myuhneituhpa alykhei hra awpa a cha. i) chavata Zawhana cha Zisu viasa (15:13-15); ii) Myuhneituhpa thapatlôna rai a hria; iii) Myuhneituh ao a thei aw (5:25; 10:3-4); iv) Myuhneituhpa alyna ao liata aly hra. Chavata Zawhana cha myuhneituhpa atyulâhtuhpa hawhta Zisu châta pahnokheina rai a hria.
Zawhana: Mei-ôh
Zawhana cha Zisu Krista tlaita mei-ôh khaih ngaitapa a cha a tah (5:35). “Khaihna” tahpa hawhrawh he Zawhana châta hma beihleipa ta Zisu Krista châta hmapa a cha (1:1-4, 9; 3:19-21; 8:12; 9:5; 11:9-10; 12:35-36, 46). Chavata mei-ôh cha khaihna papuana rai a hriapa hawhta Zawhana chhao cha Khaihna a chapa Zisu phuahna rai a hria. He khaihna bie he biehmeiseihpa a cha. Chavata Zawhana cha khaihna bie a phuahtuh awpata nata Zisu chhao cha Biehmeiseihpa pahnosa awpata azupa a cha (18:37). Zisu cha ano pohpa ta Khaina kyh cha phuahluah ta Zawhana deikua cha achâhkheina ta Khaihna a chapa Zisu cha apahnosa. Zawhana cha mei-ôh hawhta Zisu châta khaihna a papuatuhpa, pachhana thatihpha a papuatuhpa a cha.
Bie pachhasana
Zawhana thatih he achyh ta deita Zawhana châbu liata eima hmô. A yzie cha ano a laluah leina ta Zisu a laluah via thei nawpata a cha. Ano kyh a rei nawpa su achyh kaw. Zawhana ta ahneipa motto cha “Zisu cha a pathâh rili awpa a cha, kei deikua ei nawh rili awpa ei cha” tahpa a cha. Ano he Zisu Krista a châhkheituhpa ngâchhihpa a cha.
Zawhana cha Zisu a châhkheituhpa achana he a raihria tohpipa cha ta, anodeikua ziaziâh hropazy tawhta châhkheituhpa a chana kyh he a palasa lyma. Batituhpa hawhta Zisu cha a vy awpa Messiah hawhta phuah ta, tlâh-awtuhpa hawhta Zisu Krists cha pachhana (puasaina thiehpa) a vaw tlôkheipa ta tlâh-awkhei ta, pachutuhpa (rabai) hawhta ano azituhpazy cha Zisu lata chhitha ta, Myuhthieh tyukhai hawhta Zisu Krista awnanopa myuhneituhpa cha pahnokheina rai a hria. Mei-ôh hawhta Zisu Krista khaihna cha papuasa ta, cha ziazâh hropa zydua cha Zawhana Zisu châta a châhkheina dâh chinano sai a cha.
Chavata Zawhana hawhta khaihna bie kheita e eima phuah hra aw. Keima a pakyna ta phuah awpa a cha. Zisu pahnona he keima a reisina a tao lyma aw. Khaihna a puana su ta aduapa ta Zisu a pahmô theituhpa cha su vy. Kaohro lâtawhta, eima chakaona cha Zisu Krista vâta nata châta cha mawh sy. Thatihpha eima chhopazy cha Zisu Krista thatih cha mawh sy. Eima pachupazy cha Zisu Krista kyh pahnosana cha mawh sy. Eima lypazy cha Zisu Krista alyna liata cha mawh sy. Eima hro chhao Zisu Krista khaihna a pamosatuhpa hmeiseihpa cha ba suh vy.