Dawlei khi, MEC KTP CC Conference ei 30 na ahmana su

Mara Evangelical Church Krizypa Thyutlia Py ei 30 na CC Conference cha Dawlei MEC Local Church liata January 18, 2017 (Chutyhnoh) ta tlôpakipa châta noh 2 chhô (January 19-22, 2017) ahma khai tawta Abeipa ngiachhina vata hlaotlôhna chhaota January 23, 2017 (Hriatuanoh) noh ta paipa acha. Khichhai atlô theipa zydua 650, Pastor atlô theipa zydua mo 7 pha eita khichhai chhao khichho chhao 1000 hleita Biepipa “A mopatlah Thyutlia” hmâpata rônah kawpata he conference he  ahmapa acha.

Anoh 1 na (Day 1) liata Leadership training taopa châta Macha Zasaw nata Rev. Dr. Zodau zyta pachuna ama hnei. Macha Zasaw ta “Thyutliapa nata soh mohnohna” tapa pachu ta, Rev. Dr. Zodau ta “Khazohpa a pahnopa Thyutlia” tapa a pachu. He pachuna he Mara Thyutlia zy châta peimawh kawpa achâ vata a nathlietuhpazy thata ama thôkhei tapata thatih daopa acha. (Ama pachupa paper he daothei awpata maraec.org ta hma la haita a daothei patanata he website articles sona su liata eima vaw so aw).

Anoh 1na ahmana za liata Hlapy nata Thatihpha Drama ataopasuana zy hneipa châta ataopasua theipa hlapy zydua cha sa 6 a pha. Hlapy amasapa pha kaw saita, Abeipa rônahna ama palâsa hmeisei. He hlapy a taopasuana liata pakhana a hmopa cha Sabyh KTP hlapy châta sa 2na cha Para KTP hlapy acha. (Sabyh KTP hlapy nata Para KTP hlapy nothlahpa a ry liata tawpa acha.) Drama ataopasuana liata Sabypi KTP ta pakhana hmota Sabyh KTP ta panona a hmo.

Anoh 2 na (Day 2) liata KTP CC ryureina hneipa acha.

Anoh 3na (Day 3) noh he Pahanoh châta Apakhyna liata Rev. Rakhai (Concern Secretary) ta thatihpha bie reina nata Abeipa chhôkha pati niena chakaona a hnei. Za a pakhyna service liata Rev. Beikhai ta thatihpha bie pachuna a hnei.

Atako cha KTP soh ama thyu hluchaina kô châta KTP soh ama zathyu tyhpa history ama panano haw tana acha. Aly achhi hmeisei. Soh a thyutuhpa Local Church to tawta KTP nata mo pakha zydua chô liata KTP chhituhpa zyta alyna thata ama hnei. (Information akipa eima hnei malei vata soh thyupa zydua palâsa thei ma mapi. A ki patanata eima vaw palâsa aw) Abeipa ta KTP sahlao zydua he Krista vyupata lyuchâpa pachâsa lyma bei mawh sy. ECM delegate nawh deikua, Tisi khi liata amo KTP pakhypi a y hrapa vata kaw hlaothei vei.

Local KTP report tawta amopatlahpa zy

1. Taula Local KTP tawhta zakha reita thlachhana ama hnei thei.
2. Chali Local KTP tawhta vaduana a tyhpa chhokha zy hnota chakaona raihria ama hneithei.
3. Teina Local KTP tawhta atlâleipa Matupi lâ va dy eita, mokhana pha ngasapa ama hnei thei.
4. Taubu (A) Local KTP ta Macha naw châta thlachhana ama hnei thei.
5. Elda nata Sabyh Local KTP tawhta Biehrai a chhana ta reina ama hnei thei.
6. Losieh Local KTP cha KTP adua thiehpa achâpa chhaota Awnanopa châta Keyboard pha ngasapa ama chalei thei.
7. Taulai Local KTP ta fund châta Awh palyna ama hnei thei.
8. Sabyh Local KTP ta bao a ngaipa lyu nata O sana ama hnei thei.
9. Matupi local KTP he KTP hry liata Music Instruments pha chaipa ama hnei thei.

Hlapy a taopasuana liata sa 1 na a hmopa Sabyh Local KTP

Hlapy ataopasuana liata pa 2na a hmopa Para KTP hlapy

Thyutlia nata Soh mohohna tapa a pachu ngapa Macha Zasaw

(L to R) Por. Pastor Ngobeichhua (Sabypi biatuhpa), Rev. Dr. Zadau (Lialaita biatuhpa), Pro. Pastor Beilawkhai (KTP Secretary), Rev. Beikhai (Sabyh Biatuhpa)