2016 kôchhô Mission chakaona raihria reportna nata mission chakaona saipazina meeting cha Mission Director Rev. Lechau chhithapata mission field to tawta field director zydua a hlaopata Evangel Mission Office, Sittwe liata January 12-15, 2016 noh ta taopa acha. Meeting liata Mission raihria nata azaopata ama reipa hlupi a y taraw pata zawpi lâta pahnosa a ngiahpazy ary liata palâsapa acha.

2016 Mission field thokha zy liata chipho sakha nata sakha likaw ta buana, noh-khi (weather) phaleina vata ti laina (flood) hawpa rairuna zy y hrasala missionary zy ngachhipata ama chakaona cha Abeipa Khazohpa ta byhna pieta ngiapâthiehpa mo 469 hmo theipa acha. Abeipa moh cha chhazaw ta reithaipata y mawh sy.

Krismas daihti he Zisu a ngiapâ mahleipazy kyhchhi a vaw hlao eita, thatihpha bie ama nathlie nawpa daihti rypao chaipa achâpa vata Krismas kyhchhi he aronah kawpata a hma tyhpa châta, 2016 Krismas chhao he su 12 liata a hma theipa acha.

Ngiapâtuhpa malu a pôh via lymapa vata Khazohpa a chhy nawpa su Achhyna o he thata peimaw eita, Mara awnanopa ngiahpâtuhpazy ta achhyna o sa nawpata taka nata thaza hlupi thyu eita, 2016 kôchhô ta achhyna o ama sa patlôtheipa 8 phata sa ngahaipa 7 a pha. Daihti reileipa liata sa patlokhai thei-awpata beiseipa acha.

Mission Director Rev. Lechau ta, “he hawta hlaotlôpata mission eima chakao theipa he Mara awnanopazy hriapasana vata châta,  piena nata thlachhana ta a chakao theipa mo pakha, chhôkha nata awnanopa phupy zydua hnota thata ei chaly ei”, tapata mission chakaona liata a hlaopa zydua hnota alyna bie a rei.